آقـميرات گــورگــنــلي

قيات حان

خـــزر ياقا توركمنلرينگ بلـّي يولباشچيسئنينگ گــؤرشلري و آجي تأله يــي

 

 

 

مضمــــونـــــــي

 

گيــريش…….……………………………... ص2

 

قياتينگ گؤرشي و چلكنه گليشي…...………...... ص7

 

قيات حانينگ روسلاردان حاراي گؤزلشي.….……ص 10

 

اورسيت بيلن قاتناشيقلار.……………………..ص 21

 

چلكنده ياغداي ……………..……………….ص 29

 

بنديليكدأكي آجي گونلر…. …….……………..ص 31

 

نأمه اوچين تراژديك ياغدايي …………………ص 35

 

بنديليكده يازيلان شيغيرلار………………….  ص 37

 

ياغشي محمدينگ قـوشغـيلاريندان……………  ص 39

 

قوشماچالار………………………………  ص 45

 

      اسنادلار   

      قيات حانينگ شجره سي

      صوراتلار

 

پيدالانيلان چشمه لر……………………….   ص 59

 

 

 

 

گـــيــريش

 

   19- نجي عصرده توركمن حالقينينگ تاريخينده اينگ اساسي و مهم واقعه لر بوليار. روس و ايران دؤلتلرينينگ خزرينگ كنارلارينا آرالاشماغي و اولارينگ بو يرده اؤز قشونلاري اوچين حاربي قرارگاه سالديرماغي و شوندان سونگرا توركمنلرينگ دنگيز اوستي سؤودالارينه كنترل اتمگـي حالقميزينگ اركينليگـينينگ قيسيلماغينه سبأپ بولدي.

1797- نجي يئلده ايران پادشاسي آقامحمدخان قاجارينگ گرجستانينگ اوستونه ادن ايكينجي حاربي يؤريشي وقتي، شوشه قالاسينده، حيذماتكأرلري طاراپيندان اؤلدوريليأر. اونونگ يرينه گچن محمدشاه هم آذربايجان و قـفـقازلارده باسيبالجيليق سياساتيني دوام اتديريأر. بو دؤرده ايكي گزك روسلار بيلن ايران آراسينده اورش اودي توتاشيار. هر ايكي اورشده ايران يئنگيليأر. ايكي دؤولت آراسينده گلستان و تركمنچاي آدينده شرط نامه لاره قول چكيليأر. شول شرط نامه لارينگ قول چكيش داباراسينه خزر ياقا يموت /جعفرباي توركمنلرينگ بلـّي ياشوليسي(كدخداسي) قيات حان هم قاتناشيار. شوندا قيات حانينگ آياق ديره مگـي اساسينده ايرانينگ حاربي گأميلرينينگ خزر دنگزينه گيرمگـي قاداغان اديليأر. سبأبي ايرانينگ حاربي گأميلري كوميش دفه و خوجه نفسي توپ اوقونه توتوپ، ايله گون برمه يأردي.

اترك- گورگن و اساسان خزرينگ ياقاسينده ياشايان توركمنلري باش اگديريپ اؤز كنترلي آستينده ساقلاپ اولاردان سالغيت يئغناماق قاجار پادشالاري اوچين اؤرؤن ضروردي. شونگا گؤرأ آقامحمدشاه و محمدشاه بيرنأچه گزك توركمنلرينگ اوستونه قشون يولاپ، اولاري قـرغينه بردي، اوبالاري تالاپ، مال- قارالاري و انسانلاري سوريپ آليپ گيتدي. توركمن حان- بگلري تهرانده ضامون (گرو) ساقلانياردي. تهرانينگ 20 كيلومتر گوندوغارينده يرلشن «توركمن ده» اوباسي شول توركمنلر طاراپيندان اساسلاندي. بو اوبه هنيزم اؤز عمريني سوردوريأر.  قاجار شالارينينگ تـــوركمنلره هجوملري باراسينده ايــرانــــلي تاريخــچي لسان الملك سپهر «ناسخ التواريخ» كتابينينگ 1- نجي جلدينده شئيله يازيپدير:

" 1821- نجي يئلده/ 1242- نجي قمري يئلينده قيات حان كميش دفه ده قوزغالانگ توروزيار. چهارشنبه گوني مرد آيينينگ 22- سينده ساعت 45/8 –ده ، روسلارينگ 2 ساني حاربي گأميسي آشير آدادان كميش دپأ يولا دوشيأر. آسترابادينگ حأكيمي بديع الزمان ميرزا و قشون باشليغي محمدتـقي خان هـزارجريـبي، قــيادينگ قارشيسينه سؤوشه گيريأر. پنجشنبه گوني مرد آيينينگ 19- ينده قشونوميز كؤپ سانلي جعفربايي اؤلدوريپ، عيال و چاغالاري اولجه آليپ، آستراباده دولانيپ گلدي".

  ايرانينگ سازمان اسناد ملي اداراسينده يئنه- ده بو هجوملر باردا شئيله سند ساقلانيار:

" 1830/1251ق– يئلينده شاهـزاده اردشير ميرزا تهراندان يؤريته قشون بيلن گورگن و آستراباده طاراپ گؤنده ريليأر. اول اؤزي بيلن تهران، دامغان، سمنان، شاهسون و كردلردن عبارت قشون بيرليكلريني هم آليپ گليأر. توركمنلر يئنگليأر. اسير دوشنلر تهرانه آلنيپ گيديليأر. روس دولتي ايران شاسيني بو يئنگيش بيلن قوتلايار".

              [بو سندلرينگ كپيسيني قوشماچه بؤلومينده گتيرديك]

  قيات حان، ايرانينگ گون سايئن آرتيان بو هجوملريندن بيزار- پتـنگ بولوپ، اؤز تيره دشلري بيلن چلكن-ه گؤچوپ گيديأر. اول اورسيئت پادشاسينه يازان خطينده، اؤزلريني رعـيت ليگه آلماغيني خواهش اديـپدير. يؤنه روسلار بو ايشده ايكي يوزليليك اديـپدير.

قيات حان اؤز زمانه سينينگ دوشونجه لي آدميسي بولوپدير. اونونگ اوغوللاري ياغشي محمد و قـديرمحمد (كأيرده اوني خدر، خدرمحمد دييپ هم آغزاپديرلار) هم اديل آتالاري يالي ايل حالار آدملار بولوپ يتـيـشيـپديرلر. قـيات حانـيـنگ نبـيره لرينده لألـي حان(حان يـموت) 1924- نجي يئلدا عـثمان آخونينگ جمهوريت قورماق اوغرونداقي حركتينه قوشوليپ، كموش دفــه ده « يـــاش تــورك» انقلابچيلاري بيلن بيله ليكده حاربي تعليم بريأن مكتب آچيپ اونگا يولباشچيليق اديأر.

قيات حانينگ آغـتيق چاوليقلاري هم سوادلي آدملار بولوپ يتيشيأر. شولاردان قيات حانينگ چاوليغي مشهور نظــرمحمد دير. بو حاقده شئيله ماغلومات بار:

" توركمنلرده ايلكينجي گزك يؤريته بيليم آليپ، صورتكش آديني آلان نظرمحمد(نيكولاي- ده ديـيلـيـپدير) يمودسكي دير. نـظـرمحمد،1860- نجي يئلده خاركف ده دوغوليار. اونونگ دأده سي پالكوفـنـيك(سرهنگ) نيكولاي(آنه محمد قاراش حان) نيكولايويچ يمودسكيدير. هنره بولان هوسي آتاسيندان گليأر. اول توركمن چارواسينينگ، دايخانينينگ، باليقچيلارينينگ دورموشينه باغيشلان اثرلريني " گلين"، " يموت اؤيونده"، " كؤپت داغداقي دوشـلگه"، " تكه لردن ايكي سانيسي" دونيأ تانايار. نظرمحمد عيسوي/مسيحي ديـنيني قبول ادني اوچين اونگا نيكولاي آد بريليأر. توركمن ديليني، آتا واطانينينگ مردانه گچميشيني سؤيمگـي تامديره چاليپ آيديم آيتماغي باشاريپدير. اجه سي اليزابت ايوانووانينگ برن تربيه سي نظرده اولي تأثير قالديريپدير. نظرمحمد  اؤز اثرلرينده دموكراتيك دأپلري اؤسدوريأر.

  نظـرمحمد 1897- نجي يئلده آرادان چيقيپ، سن پطربورگ- اسمولنسك قــونومچيليغينده جايلانيار.

  توركمنيستانينگ وزيرلر شوراسي 1990- نجي يئلينگ ژوئن آينداقي قراري بيلن نفت داغ شأهـرينينگ چاغالار چپـرچيليك مكتبينه نظرينگآدي داقيلدي". ( نورمحمد رحيم اوف: سيز توركمنيستانينگ تاريخيني بيليأرميسينگيز. آشغابات. مغاريف نشرياتي. 1991  صص 62-61)

   حأضير توركمنصحرانينگ كميش دفه، بندرتركمن و گنبدقابوس يالي شهرلرينده قيات حانينگ نبـيره لري قيادي فاميلي بيلن ياشايارلار. اولاردان كأبيرلري ايرانده ملي-آزاد اديش حركتلره قاتناشيپ، آتا- بابالارينينگ كسبيني دوام اتديرديلر و اتديريپ گليأرلر.

 

قيات حانينگ آستراباد حأكمينه قارشي گؤره شي و چلكنه گؤچيپ گليشي

 

1813- نجي يئـلداقي اورشده ايران، اورسيتـدن يئنگليأر. ايكي دؤلت آراسينده «گلستان» آدينداقي ياراشيق ائـلالاشيغه قول چكليأر. شول اساسده روسلار خزر دنگزينه اؤز حاربي گأميلريني گتريپ چلكن و آشرآدادا حاربي قرارگاه ساليپ، بو يرلري اؤز كنترلينه گچيرمأگه چاليشيار.

روسلار توركمن توپراغيني باسيپ آلماق اوچين اوزالي بيلن جاسوسلاريني أيـبريپ، ايلاتينگ حال- ياغدايني بارلاديار.

1820-1819–نجي يئللار آراليغـينده اورسئيت حكومتينينگ تابشيريغي بويونچا «نيكولاي موراويف N.Muraviev» شاه قدم آيلاغينه طاراپ يولا دوشوپ، ساري بابا داغينينگ اوستونده گچيپ خيوه حانليغينه باريار. اونونگ سياحاتينينگ مقصدي خيوه حاني بيلن قاتـناو آچيپ، اينگ اساسي هم توركمنلرينگ ايچكي ياغـدايني اؤورنمك بولوپدير. يئـنه بير مقصدي بولسه توركمنلري اورسيت بيلن قاتـناشيق ادمأگه ميل لنديرمك بولوپدير. موراويف 1819- نجي يئـلينگ ژوئن آيئـنده كموش دپأنينگ قولايئنده و سونگره چلكنده بولوپ، قيات حان بيلن دوشوشوپدير. اول يرده 40 مونگ اؤيلي توركمن ياشايار، اولار ايران شاسي و استرآبادينگ حأكمينينگ ظلميندان بيزار بولوپ، اورسئيدينگ رعيتي بولماغه راضيديغيني ديله گترينديگيني موراويف بللأپدير.( موراويف-ينگ: خيوه سياحتي كتابيندن)

 

قيات كيم؟

  يموت توركمنلرينينگ جعفرباي تيره سينينگ نــورالي شاخه سينينگ «اسنقـولي كــؤر» بؤله گينده بولان قيات تاقمين 1750- نجي يئللارينده دميرچي اوستانينگ ماشغالاسينده دونيأ اينيأر. ياشليقدا قياتينگ اؤزي- ده دميرچيليك اديپدير. اونونگ دأده سينه « ساده حان» دييليأر دييپ، اورونبورگينگ سامارا شهرينينگ فرماندار نظاميسي پروفسكي يازان بير حاطينده بللأپدير.

قيات ياش وقـتينده كموش دفه ده، آسترابادينگ حأكيمينينگ بويون اگديرمه سياساتينه قارشي بولوپ، اونگا قارشي گؤره شيأر. سونگرا اؤز تيره دشلري بيلن چلكن-ه گؤچوپ باريار.

خزر ياقالاريندا ياشايان توركمنلرينگ همه سي قيادينگ اؤز حاوپسوزليقلارينينينگ(امنيت) هم دورموشلارينينگ پاراحات بولماغينينگ غميني أيـيأن آدمــديغيني بيليپ، اونگا اؤز اقباللاريني ائنانيپديرلار.

قيات حان كموش دفه دن باشلاپ، بالقان آيلاغينه چنلي آراليقداقي توتوش طايفه لارينگ وكيلي حؤكمينده، توركمن آق ساقغاللارينينگ باريپ 1813- نجي يئلده گلستانده بولان مصلاحاتينه ده قاتـناشيـپدير.

ايران شاسي خزر دنگزينينگ ياقالارينده ياشايان توركمنلرينگ آراسينده قيادينگ اولي آبرايينينگ بارديغيني بيليپ، 1820- نجي يئللارده اوني اؤز طاراپـينه چكمأگه سينانشيـپدير. شاه، قياده حانليق درجه سيني برمگـي وعـده بريپ، اگر اول اؤزونينگ اورسئيده قارشي قارايشيني اويتگه ديپ، توركمنلرينگ آراسينده اورسئيدينگ تأثيرينينينگ يايراماغينينگ اؤنگوني آلماغا ياردام اتسه، اؤزونينگ(شانينگ) اونگا آرقا دورجاقديغيني آيديپ، اگر قيات شو تكليبي قبول ادمسه اؤلوم جزاسيني برجكديگيني آيديپ، اونگا حايبات آتيپدير. اما قيات ايران شاسينينگ بو وعده لرينه آلدانماندير، اونونگ حايـباتلاريندان قورقماندير.

ايران شاسينينگ حايباتلاري آرتيپ باشلانسونگ قيـات اؤزينينگ كموش دفه دأكي املأگيني، باليقچيليق قورلوشيقلاريني، يريني هم سوريلريني تاشلاپ چلكن-ه گؤچمأگه مجبور بولوپدير. استراتژيك تايدان بو آدا اؤرأن مهم دي و دوشمانينگ غافيلليقده اول يري باسماغا ممكينچيليك برمه يأن ياغدايه ايه دي.

قيات حان بو يرده ايلاتينگ مأتأچليكلريني اونگات بيليأردي. باكولي صناغات ايه لرينينگ شول يرلرده نفـتي هم دووزي يتـرليك درجه ده التمه يأنديكلرينده هم خبرليدي. چلكن ده بولسه شول بايليقلاري چيقاريپ آلماغه يالتانماسانگ، باسان يرينگده باردي. شونگا گؤرأ دوغوملي هم فهملي آدم بولان قيات اؤز أهلي تـقلاسيني شول بايليقلارينگ چيقاريليشيني آرتديرماغه گؤنوكــديريـپـدير. آدانـينگ ايلاتي هـم اونونگ گؤره لدسينه ايه ريپدير. شئيله ليك بيلن آدانينگ بايليقلاري دينگه بير يرلي ايلاتينگ حاجتـلاري اوچين دأل- ده ايرانينگ اينگ قولايداقي ولاياتلارينه و باشغا يرلره ساتماق اوچين هم چيقاريليپ باشلانيـپدير.

 

 

قيات حانينگ روسلاردان حاراي گؤزله شي

  قيات حان چلكن آداسينه گؤچوپ باراندان سونگ، ايران شاسينينگ توركمن حالقينه و حوت اؤزونه گؤركزن زورليغي اوچين اوندان آر آلماق خياليندان هم ال چكمأندير. اما قيات حان باشغا يردن حمايت برن بولماسه، دينگه بير كيچي جيك آدانينگ آدملاري بيلن ايران شاسينينگ قارشيسينه گؤره شمگينگ قـين بولجاقديغيني بيلـيـپدير. اول نأمه اوچين اورسئيده اميد باغلاديقا؟

شول دؤورده اورسئيت پادشاسي، ايرانينگ پنديني بريپ بيليأن گويچلي دؤلت حؤكمينده ياقاسيني تاناديپدي. شئيله- ده اورسيت، خزر دنگزينينگ گوندوغارينداقي ير- يورت بيلن بارها قيزيقلانيپ، اونگا ايزلي-ايزينه بارلاغچي ايبريپ باشلاپدير. قيات حان هم دونيأنينگ شول واقـتـقـي گويچلي دؤولتي بولان روسيه بيزينگ يوردوميز بيلن شئيله قاتي قيزيقـلانيارقا، اول توركمنلري هم بير دوشماندان قـورايان اعتبارلي آرقادايانچ بولماقدان بويون قاچيرماز ديـيپ فكر اديـپدير.

يؤنه قيات حان اورسئيدينگ دويپ مقصدينه گؤز يتيريپ بيلمأندير. اونونگ خير ايش اتجك بولماق نيتي بيلن اديليأن زات دألديگينه، اؤز خريد ماللاريني ساتار يالي و اؤسوپ باريان صناغاتي اوچين چيگ مال آغتاريانديغينه دوشونمأندير. اول خزر دنگزينينگ كنارلاريندان ممكين قدر كؤپ قالا سالماغا چاليشيان تـزارلارينگ دويپ مقصدينه گؤز يتيريپ بيلمأندير.

  توركمنلر باريپ 1713- نجي يئلده اؤز وكيللري «خوجه نفس حاني» پطربورگه يوللاپ، اورسئيتدن حواندارليق سوراپديرلار. سونگرا توركمنلر آستراخانينگ(آژدرحانينگ/هشترخان)، اورنبورگينگ حأكميتلرينه انچمه گزك خطلار دير وكيللريني ايـبريـپديرلر.

اورسيئدينگ ايشه ور توپارلاري اوزالي بيلن اؤز بهـبيـتـلرينه قاوالاشيپ، چلكن آداسيني روسيه بيريكديرمگينگ آماتليديغيني ميداما آغيزلاريندان دوشورمأنديرلر. پطربورگه خط يوللان توپارلار بو آدانينگ و توركمنلرينگ اولكه سينينگ 3 ساني بهبـيتـلي طاراپينينگ بارديغيني آيديپديرلار. اول سؤودا اوچين، كؤپ باليق صناغاتي بولاني اوچين و باردي- گلدي ايران بيلن اورش بولايسا، مفت قشون بريپ بيلجكديگـي اوچين بهبـيـتـلي ديليپ گؤركزيليـپدير.

  19- نجي عصرينگ باشلارينده كنار ياقاسينداقي توركمنلرينگ ياغدايي قاتي آغيرلاشيپدير. خيوه حاني و قاجار شاسي دينيغسيز چوزوپ، اولاري تالاپ، يورتلاريني توزدوريپ گيديأردي. شئيله ياغدايا قيات حان اورسيئده اؤز خلاص كأري حؤكمينده قاراپ، اونونگ قـفـقارداقي حاربي فرماندارينه انچمه گزك خط يوللاپدير. اونده شئيله دييليپدير:

 

" سيزينگ جنابيـنگزه اشبو عرضي يوللايارين. يعني آسترابادليلار بيلن خيوه ليلار چلكن لي، گورگنلي، اتركـلي يموتلاري قيسيپ، قـورقي آستينه ساليارلار. اؤزلرينه تابين(تابع) اتجك بولوپ هرگون آزار بريأرلر. گپـينگ قيسغاسي، اولار شو حالقلاري اؤز پنجه لرينه سالجاق بوليارلار. بيزينگ بولسه سيزدن باشغا اميدگاريميز، حوانداريميز يوق. هــي بير باشليق گلمزميقا دييپ گيجه سي- گونديزي صبرسيز قاراشياريس. شوندا بير باشليغينگ قـُوراغي آستينده دشمن دان حذر ادمأن پاراحات هم آسوده ياشاپ بيلجك".

  

    آدا گيديپ گلن هر بير آدم اورسيئت حأكميتلرينه بريأن حاساباتينده قيات باراده جيكمه- جيك ماغلومات برمأگه بورچلي اديليـپـدير. داشاري ايشلر وزيرليگـينينگ آسيا بؤلومينينگ باشتوتاني، اورنبورگينگ حاربي فرماندارينه يازان حاطينده قيات حان بارادا شئيله ديـيپدير:

 

" قيات بگ توركمنلرينگ يموت طايفه سينينگ بير بؤلگــينينگ آق ساقغالي حساب اديليأر. اول شو توركمنلر بيلن بيرليكده نفـتـلي چشمه سينينگ كؤپلوگـي بيلن چلكن آداسيني(باشغاچه آيديلانده نفـتـلي آداني) توتوشليغينه ايه ليــأر. قــوري يرده ياشايان قـومـداشلارينينگ آراسينده- ده اونونگ آبرايي بار".

 

  حاطينگ دوامينده قيات حانينگ ايران شاسي بيلن دشمن ديغي، اورسيئده وفالي ديغي، حتي اوغـوللاريني اوقاتماق اوچين تـفـليسه[گرجستانينگ پايتختي] ايبرنديگـي مأليم اديليپدير.

1821- نجي يئـلده بير روس گأميسي خزر دنگزينده هلأكچيليگه اوچرايار. شونــدا قيات حان گأميدأكيلري قوتارماغا ياردام اديپدير. 1822- نجي يئـلينگ ژوئن آيينينگ بيرينده قيات حانه منتدارليق حاطي قاوشيريليليار. اوندا شئيله دييليپدير:

 

" شايات نامه[شهادت نامه]

اوشبو شايات نامه چلكن- نينگ حأكيمي قيات حانه بريلدي. يعني من اؤتن 1821- نجي يئـلده پادشاليق آذيقلاري داشاماق بويونچا آستراخانداقي اداره لر كميته سيندن باشليقلارينگ بويروقلاري بويونچا ايرانلي تأجر حاجي عبدالله يف-ينگ اؤزومه ائنانيلان Svyatoy Ioann آدلي گأميسي بيلن قـوري ير قشونلاري اوچين دربند قالاسينه دنگيز بيلن آذيق آليپ بارياديم. شو ماحال قارشيدان گويچلي قـاي توروپ گأميني توركمن كنارلارينه باقان آليپ گيتدي. شول يرده قره بوغاز آيلاغي بيلن شاه قدم آيلاغينينگ آراسيندا گويچلي قـاي و قــُومـلار ضرارلي گأمي ويران بولدي. گأمي كنارينگ قـولايئنده يالپاق يره زئنگليپ دؤويـلدي. اشبو آحوالات 1821- نجي يئلينگ 30- نجي نوامبرينده بولدي.

شونينگ يالي بدبختچيليقـلي ياغدايدا، قــاي- ينگ گأميني يالپاق يره زئنگيپ، دؤون يرينينگ تؤوه ركلرينده حالقلارينگ ياشايانديغي اونچاقلي داش دأل يرده نــفــتـلي آدادا( چلكنــده) اورسيئدينگ باشليقلارينه وفالي قيات حانينگ ياشايانديغي مانگا مأليم بولانسونگ، من بير افسر هم بير ايشچي بيلن گأمأ يوكله نيپ گتيريلن ايكـي كـوره كلي قايق-ه مونيپ 10- نئنجي دسامبرده دنگيزه يولا دوشديم و الله نينگ قاراشيغي سايه سينده شول آيئنگ 19- ينده چلكــنه ساغ- آمان يتيپ، گأمينينگ حيذماتكأرلريني خلاص اديشمأگه كمك ادمگيني سوراپ قيات حانينگ حضورونه بارديم.

قيات حان منينگ عرضيمي اشيدن بادينه اؤز راياتينداقي توركمنلردن ياراغلي آدملارينگ 60- سي بيلن 4 قايق جملأپ، اؤز اوغـلي قـديرمحمدي حألكي آغزان آدملاريم بيلن مني هم يانيندان آليپ، حوت اؤزي گأمينينگ هلأك بولان يرينه اوغرادي، باريپ گؤرسك… اول يرده حيوه ده ياشايان 500- دن كؤپ ياراغلي توركمن بار اكن. اولار گأميدأكي أهلي آذيغي تالاپ آليـپديرلار. يدي ايشچي بيلن دربنددأكي مهندس توپارينينگ بـير عسگرينده عبارت بولان كنارداقي توپاري هم اسير آليـپديرلار.

قيات حان بئيله كؤپ مأحلــلأني گؤريپ، اولارينگ تالاپ آلان زاتلاريني گويچ بيلن اللرينده آليپ بولماجاقديغيني بيلن سونگ، شول زاتلاري آلجاق بولوپ كؤپ تـقلا اتدي، جاني- تـني بيلن يالباردي. حتي حايبات هم آتيپ گؤردي. اينگ سونگـي هم اولارينگ داغي بولماسا اسير آلان آدملاريني برمكلريني سورادي. اولار 8 آدمدن دينگه ايكي ايشچيني برديلر. اولاري آليپ چلكنه قايديپ گلديك. شول يرده بيز گأمينينگ كاپيتانينينگ هلأكچيليك و اسيرليكدن حلاص بولان 4 آدمسي بيلن بيله ليكده 1821- نجي يئـلينگ 26- نجي دسامبريندن تا 1822- نجي يئـلينگ 1- نجي جولاي آيئنه چنلي قيات حانينگ حواندارليغي و حمايتي آستينده بولديق. بيزي اونونگ حوت اؤزي اكلأپ- ساقلاپ، آذيغيميزي هم گيـيم- اشيگيميزي بردي. حوسسارليق اتدي. اول بيزه همه زاتــده كمك اتدي. من ساويـقلاپ، آغير سيرقاولاديم، قيات حانينگ اؤزي مانگا شئيله ام اتدي:

1-شره بلي بــُوغا توتدي 2- گؤك- نيل بولوپ چيشن آياقلاريمينگ آغيرلي يرلريني پأكي بيلن ديليپ، قان آلدي، انداميمه كـولكه دووز سورتدي  3- آغيرلي يرلريمي قـيزديرلان دمير بيلن دآغــلادي. شو امــلر اديلندن سونگ من دررو قانيماتــلاشيپ اوغــراديم. باشدا الله، قالـيــبرسه- ده قيات حان قاراشيق اديپ، اؤلوم حاوپلي آغير كسلدن كمسيز قوتولديم. شوندان سئنگ اول مني يانيمداقي افسر و 3 ايشچي بيله شول تؤوره كده باليق توتوپ يؤرن گأمأ مونديريپ، باكو قالاسينه اوغراتدي.

شئيله ليك بيلن قيات حانينگ چأكسيز ياغشيليق هم حوسسارليق اتمگـي آرقالي واغشيچـيليقــلي اسيرليگه دوشمكدن و اؤلوم حاوپلي كسلدن آمان-اسن قوتولديم، شونگا گؤرأ من شو زاتلارينگ همه سيني شايات نامه ده دوشونديريپ، قولومي چكيپ، شوني قيات حانه برمگـي اؤز بورجوم دييپ حساب اديأرين".

چلكن اوباسي   1822- نجي يئلينگ 1- نجي ژوئن آيــي

دريادار  واسيلي فئودروف بارانوف

   قيات حانينگ داشقي دشمانلاريندان باشغا- دا ايچكي حان- بگلرينگ اؤزي بيلن اديأن بأسدشليگيندن اجير چكيأردي. اونونگ چلكن و عمومان خزر ياقا توركمنلرينگ كدخداسي ديغينه قارامازدان، بيرنأچه آق ساقغال قياته و آدملاره سالا- مصلحت سالمان، آستراخانينگ(اژدرحانينگ) حاربي فرماندارينينگ يانينه باريپ، اؤزلريني اقرار اتديرمأگه، حتي توركمنلرينگ آديندان اورسيت رعيت ليگينه گچمگـي هم اورتا آتيپديرلار. اولار دينگه اؤز شهراتلرينينينگ ايزينده قاولاشيپديرلار.

اورسيت حكومتينينگ چلكن ده اؤز دوروميني(موقعيت ني) بركيتمأگه و قيات حانينگ اؤز قومداشلارينينگ آراسينداقي آبرايئني ساقلاماغا چالشانديغيني كؤپ سانلي آرشيو دكومنتلر(اسناد) ثبوت اديأر. مثال اوچين 1821- نجي يئـلده چـلكـنه گلن كاپـــيتــان نــيـكولاي مـــوراويف قيات حاني اورسيدينگ ائنامينه گيرن آدم حساب اديپ، اونونگ داشينه جبيسلشمأگه چاغريپ، أهلي يموت آق ساقغالـلارينه يوز توتوپدير.

1827-1826–نجي يئللارداقي اورسيت-ايران اورشي وقـتـينده، اورسيت حكومتي طاراپيندان اؤجوكديريلن توركمنلر 800 آطلي بولوپ ايرانينگ اوستونه چوزوپديرلارو شول چوزوشه حمايت برمك اوچين ژنرال يرمولوف، ستوان باسارگ-ينگ يولباشچيليغي آستينده توركمنلر تهرانه قولاي باريپديرلار. شوندا حتي ايرانينگ پادشاسينينگ قيل يال (آط و يابي) سوريسيني هم اله ساليپديرلار. شول شاولي يؤريشه قيات حان يولباشچيليق اديپدير. توركمنلر، ايرانليلارينگ مونگدن بير تالانگچيليقلي يؤريشينه جوغاپ برمأگه سينانشيپديرلار.

ايران حكومتينينگ قشونلاري حايال ادمأن توركمن اوبالارينه چوزيار. يؤنه اولار توركمنلرينگ حركتينينگ اؤنگوني آليپ بيلمأنديرلر. ايران حكومتي هم يرده هم دنگيزده اولارينگ سؤداسيني كنترل اديپ، توركمنلردن آغير سالغيت يئغناماغي ايسلأپدير. توركمنلر بويون اگمأنديرلر. توركمنلري اؤز الينه آليپ بيلمه ديك ايران حكومتي كأماحال اولار بيلن ائلالاشماغا راضيديغيني- ده مـــأليم اديپدير. مثال اوچين 1835- نجي يئلده ايرانليلار اؤزلري اوچين مسخره چيليقلي شرطلره راضي بولوپ، اگر توركمنلر آستراباد و مازندراني قــُوراسالار اولارا 10 مونگ خروار تــوويي(tüwi) برمگـي وعده بريپديرلر. توركمنلر اوني قبول ادمأنديرلر.

شول دؤرده تكه، يموت و گؤكلنگ توركمنلري بيرلشيپ، ايران شالاري و اولارينگ حأكيملرينينگ قارشسينه گؤره شيپديرلر. مثال اوچين گؤكلنگلر بيلن يموتلار، مختومقـلي حان يمودينگ باشتوتانليغينده گورگن آقارينينگ بويونده ايرانينگ قشونيني يئنگيـپديرلر.

ايران پادشاسي 1837- نجي يئـلده مازندرانينگ حأكيمي اردشير ميرزاني قوُري ير بيلن خزر ياقا توركمنلرينگ اوستونه يؤريش قورناماغي بويوريار. اولارينگ مقصدي اسنقـوليداقي توركمن گأميلريني ياقماق و چلكن- ينگ اسكله لريني تالاماقدي. يؤنه 1828- نجي يئلده باغلاشيلان توركمنچاي شرط نامه اساسينده ايرانينگ خزر دنگزينه حاربي گأمي سالماغي قاداغان اديليپدي. شونگا گؤره ايران 1836- نجي يئـلينگ سپتامبرينده " توپالانگچي توركمنلره جزا برمك اوچين ايكي گأمي قرض برمگيني" سوراپ، اورسيت پادشاسينه يوزله نيپدير. ايرانينگ شو خواهشي اورسيت حكومتـيني قـين ياغدايا ساليپدير. سبأبي شول يئللارده اورسيت-ايران قاتناشيغي بير آز قانيماتلاشيپ اوغراپدي. ايرانينگ حاربي گأميلرينينگ خزره گيرمزليگـي اوچين، اورسيت اؤز حاربي گأميلريني برمأگه راضي بولوپدير.

شونينگ بيرليكده اورسيت، توركمنلري اؤز قارشيسينه اؤجـوكديرمك ايسله مأندير. شونگا گؤره اورسيدينگ داشاري ايشلر وزيرليگـي ايرانينگ خواهشيني رد ادمأن، توركمنلرينگ ايران بيلن بو ساپارقي چاقناشيغيني-ده اورسيت قوشولماسا- ده گچر گيدر ديئن تاما(طماع) بيلن ايشي اوزاغا چكديرمأگه سينانشيپدير. يؤنه ايران شاسي چلكن ده ياشايان توركمنلري اوجدان توتما قيرماغي يؤره گينه دويپ، ايشينگ تداركيني گؤريپدير. اورسيت امپراطوري 1837- نجي يئـلينگ آگوست آيينينگ آياقلارينده توركمن ياقالارينه ايكي ساني ياراغلي گأميني ايبرمگـي قرار اديپدير. يؤنه توركمنلرينگ اورسيده ايناميني قاچيرمازليق اوچين گأميلرينگ كاپـيتـانلارينه: " ايرانينگ قشونلارينه اترك آقارينينگ دينگه سول كنارينه چنلي، اؤزوني هم دينگه دنگيزده كمك برملي و توركمنلرينگ قارشيسينه هيچ حيلي چينلاقاي حركت ادملي دأل دييپ بويروق بريليـپدير. 

  ايران قشونينينگ دنگيز اوستي چلكنه ادن بو ساپارقي يؤريشي اوستونليكي قـوتاريپدير. آدانينگ اولي- كيچي همه سي 4 مــــونگه- ده يتمه يأن، غافـل ليقده اوستي باسيلان ايلاتي بويدان- باشا ياراغلي مونگلرچه آتيجينينگ قارشيسينه نأمه علاج اديپ بيلسين! آدانينگ ايلاتينينگ شو جزالانديريليشيني ايران تاريخچيسي لسان الملك سپهر جيكمه- جيك صوراتلانديريپـدير:

" توركمنلر قشوني گؤره نلرينده اونونگ قارشيسينه سؤه شه گيرمأگه جرعت اديپ بيلمأندير. قاچيپ بيلنلرينگ هرسي بير يانه قاچدي، كؤپـوسي بولسه قـليجينگ آستينه دوشدي. اولارينگ آغاچ اؤيلرينينگ، اوق- دأريلرينينگ، آبزال-لارينينگ هم قــُوش- قولاملارينينگ بيرانتگـي ياقـيلدي، يئنه بيرانتگـي دنگزه غـرق اديلدي".

 

   ايران چلكنـــلي توركمنلردن اينه شئيديپ، اؤج آليـپدير!

ايران تاريخچيسي اسمعيل مهجوري تاريخ مازندران( ج2 ساري 1345) كتابينده مـــازندرانينگ حؤكمداري اردشير ميرزانينگ 1837- نجي يئلداقي دنگيز اوستي بيلن يؤريشينه حامانا، اؤز حالقينينگ پاراحاتچيليغيني قــُورايان " ياغشي نيتــلي ميسيا(مأموريت)" حؤكمينده قاراپ، اوني آقــلاپ، شئيله يازيارلار:

 

" شول يئل(38-1837م/ 1253ه.ق) توركمنلرينگ جعفرباي تيره سيندن قيات ديئن بيري نفت هم دووز چيقيان يري بولان چلكني ايه لأپدير… اونونگ داشينه اويشن بير توپار توركمن بولسا آماتلي ياغداي بولان گزگــي، طبرستانليلاري اسير آليپ، اولاري توركمن اوبالارينده هم شهرلرينده ساتيانميش. شونينگ اوچين چؤلده شيره، سوودا آژدارها قليچ سيريپ توپوليان ادرمن شاهزاده ميز اردشير ميرزا، قالتامانلاري بويون اگديرمك اوچين مونگ ساني آتيجي بيلن ايلكي آشرآدا اوندان هم چلكنه باردي…"

 

البته كيمينگ قالتامان، كيمينگ، كيمينگ اوستونه چوزيپ، حالقي قيرانديغيني انصابيني يووتماديق تاريخچيلار اونگات نيغتاديلار. اولار توركمنلرينگ اؤزلريني قوراماق اوچين ادن گؤرشلريني صوراتلانديران ماحالي ايران يا- ده روس دؤلتينينگ باسيبالجيليق يؤريشلريني- ده بيان اديپديرلر.

هاوا! اورسيت پادشاسي، ايران قشونينينگ توركمنلره چوزماغا دينگه يول برمأن، ايرانينگ خواهشي بويونچا خزر دنگزينه اؤز حاربي گأميلريني ايبريپ، كمك هم اديـپدير.

ايسئم اورسيت پادشاسينينگ توركمن حالقيني نأحيلي قــُورانديغينا!! شوندان سونگ هم قيات حانينگ گؤزي يئتمه ديميكأ؟ اورسيت حكومتينه وفالي خدمت اتمگـي و اؤز حالقيني اورسيدينگ رعيتي بولماغا ائرجاق بولماغيني دوام اتديرمأگه اوني نأمه مجبور اتديكأ؟

روس كاپيتانلارينينگ ايرانه كمك برمگينه، قيات حانينگ صبرليليق بيلن جيداماغينينگ سبأبي اوزالي بيلن اولارينگ شو اديملري روس پادشاسينينگ بويروغي بيلن عمله آشيريلاندير ديئن فكرينگ ياتسا-تورسا اونونگ دويشونه- ده گيرمأندير. روس حاربي كاپيتانلار، پادشاهدان خبرسيز ايرانه كمك بريأنديگيني خيال اديپدير.

 

 

اورسيت بيلن قاتـناشيقلار اؤسيأر

اورسيت حكومتي قيات حاني قولداماغي يرليكلي حساب اديپ، اوني چلكن- ينگ دولي اختيارلي حوجايئني اديپ قويوپدير. اول آدانينگ آق ساقغالي ديليپ، رسمي تايدان اقرار اديليپدير. آدانينگ باليق توتماق ايشي هم اونونگ الينه گچيپدير. مونگا شو آشاقداقي ياغدايلار هم كمك اديپدير:

اوزال توركمنلر توتان باليقلاريني شرط نامه اساسينده آژدارحــانلي (آستراحانلي) مير باقـــروفــه ساتيارديلار. اول بولسه چلكنــلي باليقچيلاري بيانصافليق بيلن تالاپ، سؤودادان اومماسيز كؤپ قازانچ اديپدير. اونونگ اوسته سينه- ده وقتي گلنده اول آدانينگ أهلي سؤوداسيني اؤز الينه آلماغي آرزو اديپدير. بو تأجرينگ توركمنلري چوركأپ، آلان خريدلارينينگ بهاسيني شرط نامه اساسينده حسابلاشماياني مأليم بولاندان سونگرا بولسه، توركمنلر اونونگ بيلن ايش ساليشمازليغي بس اديپ، باليق سؤوداسيني اتمك اوچين روس تأجري بولان ماتوي گراسيموف بيلن شرط نامه باغلاشيپديرلار.

گراسيموف سپايچيليقلي آدم بولوپدير. شونونگ اوچين باليقچيلار هم اوني سيلاپديرلار و اونگا توركمنچه لأپ "مأتي بگ" دييپ آد داقيپديرلار. قيات حانينگ اؤزي بيلن اوغلي ياغشي محمد هم گراسيموف بيلن دوستـلوقـلي قاتـناشيقده بولوپ، باليق آلماق- ساتماق ايشينده اونونگ بيلن ائسناشيقـلي آراقاتـناشيق ساقلاپديرلار.

اورسيت حكومــتي هرحــيل سيلاغ- ســرپــايــلار بــيـــلن تــوركــــمن آق ساقغاللارينينگ گؤوينلريني آولاپ، اولارينگ اوستي بيلن خزرينگ كنار ياقالارينده ياشايان توركمنلري اؤز تابين ليغــيــنده ساقلاپدير. 1838- نجي يئلده توركمن ياشوليلارينه ايبرلجك زاتلارينگ ساناوينده(ليستينده) 4 پارچه يوپك ماتا، 3 پارچه نخ مخمل، 4 ساني آلتين يوزيك، 7 ساني آلتين مدال، كوميش چايئلان بوينوزلارينگ(شاخلارينگ) 9 سانيسي، سونگك تويدوكلرينگ 22 سانيسي، 4 پارچه مخمل، 4 ساني سامير(سمور) دريسي، 2 ساني كوميش مدال آغزاليپدير. اورسيت وكيللري، تـــوركــــــــمنلريـنگ اؤز آق ساقغاللارينينگ سؤزيندن چيقيپ بيلمز يالي، بو ساوغاتلاري ميدانينگ اورتاسينده اولارا قاوشيريپديرلار. قيات حان بولسا شولار يالي ساوغاتلاردان باشغا، كأ ماحال اؤز آدينه ايبريلن ساوغاتلاري هم آليپدير. مثال اوچين قـفـقاز حأكمينينگ سياسي گنگشچيسي 1839- نجي يئـلينگ 1- نجي ژانويه آيئــنده باكـوينگ كميته باشليغينه توركمن آق ساقغالي قيات حانه بير سمور دريسي بيلن 14 آرچين[هر آرچين 17 سانتيمتر] مخمل ساوغات ايـبرملي دييپ بويروق بريپدير. روس حكومتي اوني حتي مدال بيلن هم سيلاغلانديريپدير. بو ياغداي روس پادشاسي طاراپيندان آيراتين حاطيراسي توتوليان آدم حؤكمينده، قيات حانينگ ايلات آراسينداقي آبرايني گؤركزيپدير.

اما خزرينگ كنار ياقالارينده ياشايان توركمنلري اؤز ماشغالاسينه (رعـيـتـينه) قبول اديپ، اولاري كؤنه آرزولارينه يتيرمگـي ولين اورسيدينگ حأكيملري ايسله مأندير. اؤز رعيت ينگـه آلسانگ اولاري قــُورامالي، اولارينگ اؤنگونده اؤز اوستونگه كأبير بورچلاري هم آلمالي بولجاق آخرين! ديپ اولار فكر اديپديرلر.

شئيله ليك بيلن چلكنلي و بوتين خزر ياقاسينده ياشايان توركمنلر قوراغسيز قاليپديرلار. بو توركمنلره ايران شالارينينگ، خيوه خانلاري و بخارا اميرلرينينگ بريأن آزارلاري آرتيپدير.

مازندران حأكمي اردشير ميرزانينگ 1837- نجي يئلداقي تالانگچيليغيندان بيرنأچه يئل سونگرا، قيات حانينگ اوغلي ياغشي محمد اورسيتدن كمك سوراپ، قـفـقازداقي كميته باشليغينينگ آدينه خط ايبريپدير. اونونگ بو ايشي، ايرانليلارينگ شول ساپارقي تالانگچيليقلاردان سونگرا، ايلاتينگ نأحيلي آغير ياغدايه دوشنديگيني گؤركزيأر. خط ده شئيله ديليپدير:

 

" يوقاري باشيقلارينگ بويروغي بويونچا اورسيدينگ وزيري طاراپيندان بــيزينگ يانيـــمزه ايبــريلن «گ. س. كاره لين» أهلي ايلاتيميزي اؤز يانينا چاغريپ، بيزينگ ياغدايميزينگ نأحيلديگيني و ايسلگمزينگ خوت نأمه ديگيني سورانده، بيز توتوش يموت حالقي اورسيت امپراطورينه وفالي رعيت بولجاقديغيميزي مأليم اتديك. اما كاره لين اوغراندان سونگ وقت گچمأنكأ، ايران شاسي محمدشاه بيزي اؤز توپراغيميزدان قاوماق اوچين، بيزينگ ايلاتيميزدان هم حاص كؤپ قشون بيلن اوستوميزه دؤكولدي، شول سبأپلي اولار بيلن سؤوش اتديك، يؤنه اول گويچلي بولانسونگ اوستون چيقدي، بيزي بوتينله يين تالادي.

شونونگ بيلن سيزينگ عالي جنابينگيزدان بيزي ياراغ هم توپ بيلن اوپجين اتمك اوچين همه طاراپلايئن كمك اديلمگـي بارده بويروق برمنگيزي و شو ايش بارده دگيشلي يرينه خبر ادمنگيزي سوراياريس.

محمدشانينگ شو تالانگده 4 مونگه قولاي اؤي، اوندان باشغا-ده 4 مونگ گأميش، 60 مونك سيغير، 40 مونگ يئلقي، 500 مونگ داوار، 20 مونگ دويه گيديرنديگيميزي خبر اديأريس. بولاردان باشغا- ده شول نأكس شاه، بيزينگ دايخانچيليق اديأن آدملاريميزينگ أهلي املأگيني اودلاپ، اولارينگ بارجه زاتلاريني تالاپ آلدي، ايندي بيزينگ اير-ايچر يالي بير زاديميز هم يوق، آستراباد حانلارينينگ گؤركزمسي بويونچه محمدشاه بيزدن بير توپار عيالي هم چاغالاري اسير آليپ گيتدي.

سيزينگ عالي جنابينگيزدان بيزه بهاسي بيلن ايلاته پايلار يالي آذيق برمنگيزي توقع اديأريس، بيز اونونگ بهاسيني سونگرا، بيرنأچه يئلدان بلــلأن مهلتينگيزده دولي تؤلمأگه بورچ اديأريس. اوندان باشغا- ده بيــزينگ اورسيت رعيت- ليگينه گچيمك آرزوميزدان خبرلي بولان خيوه حانينينگ قاري قلعه گلنديگيني يادلاماغي ضرور حساب اتديم. وقت يتيرمأن بيزه كمك ادينگ".

 

  شو تالانگچــــيليــقـدان بيرنأچه يئـل سونگرا يازيلان شول خط ده ياغشي محمد اؤز آتاسينينگ چاغيرشي يالي، اورسيت حأكميتلريني اؤز وعده لرينده تاپـيلـيپ، شئيله قينچيليقـلي فرصتـده آدانينگ ايلاتينه كمك ادمأگه چاغريپدير.

اورسيت حكومتي بو گزك توركمنلرينگ خواهشلاريني جوابسيز قالديرمان، خزر دنگزينينگ كنار ياقاسينينينگ هم چلكن- ينگ أهلي ايلاتي اوچين 6 مونگ پوط اوون ايـبريـپـدير. اما شونچه ايلات اوچين آغيز دولدوريپ آيدار يالي كمك بولمانديغي دوشنوكلي دير.

قيات حانينگ اؤز حالقينينگ اقبالي باراداقي آلاداسي اونونگ روس رسميلري بيلن آلشان خطــلارينينگ همه سينده- ده آيدينگ گؤرونيأر. اونونگ 1837- نجي يئـلده قـفـقازينگ كميته باشليغينه ايبرن خطيني مثال آلايلينگ. قيات حان اؤز خطينده شئيله يازيپدير:

 

" اورسيدينگ ايرانده ايشلري اينانيلان ايلچيسي، ايرانينگ كؤشگينده بيزينگ اترك و گورگنــدأكي اوبالاريميزينگ ايرانـينگقي دير ديئن خبريني اشتديك. اول وزير دوين اؤز ايشينه باريپ، بوگون هم اييأم يوزلرچه يئـلليق ايشلري آپ-آنگسات بيليأنميش! شو آغزالان يرلرده كيملرينگ مزارلاري ياتيرقا: توركمنلرينگ كيميقا يا-ده پارسلارينگقي ميقا؟ شوني سورامانگيزي سيزينگ عالي جنابينگيزدان توقع اديأريس. سيزينگ يالي جنابلار بئيله فكرلر بيلن ايلالاشماسانگير گرك. اونونگ فكرينه گؤرأ بيز آتا- بابالاريميزينگ قالديريپ گيدن يرلرينده محروم بولايماليميشيميز".

 

 1836- نجي يئلدا چلكن آداسينه سياحت بيلن كاره لين گلنده، توركمنلر اونگا اورسيت پادشاسينينگ آدينه يازان خطي قاوشيريپديرلار.

اولار شول عرضه خطده اؤز آغير دورموشلاري، پارسلارينگ آدانينگ ايلاتيني تــوُزدوريپ، تالانگچيليقلي چوزوشلاري بارده، يئنه ايندي نأچينجي گزك اورسيت حكومتينينگ اؤز عرضه لاريني دينگلأپ، اؤز رعـيـتـينه قبول ادمگيني و قـونگشيلارينگ چوزوشلاريندان قــوراماغيني سوراپديرلار.

شول عرضه نينگ اؤزونه قاوشيرلشيني كاره لين شئيله صوراتلانديريپدير:

 

" قاضيلار، حانلار، بگلر و آق ساقغاللار اوني دابارا بيلن اليمه بريپ، تيز هم آيغيتـلي جوغابينگ اوغرونا چيقاوري، دييپ، مانگا يالبارديلار. حورماتلي قــوجه قيات حان بولسه اوني مانگا برنده، گؤزلرينينگ ياشيني دؤكوپ اؤز مهربان حالقينينگ اقباليني مانگا اينانيانديغيني آيتدي. گچن جولاي آيينينگ 2- سينده منينگ آديمه يازيليپ بريلن خط، 40 مونگ اؤيلي يمودينگ اورسيدينگ اولي حاواندارليغي آستينه گيرمك ايسله گيني آنگلاديار…".

 

  يموتلار روس پادشاسينه بو خطي تويس جانلاريندان سيزديريپ يازيپديرلار. چلكن ايلاتينينگ روس پادشاسينه اؤز رعـيتينه آلماغيني سوراپ، شئيله يالباماقلارينينگ دورموشلاريندان گؤوينلري حوش بولوپ، اديلن زات دألديگـي آيدينگ آخرين! ارتيركي گونلري باشلارينده نأ غوغا تورجاغي نأبلليكأ، شول آدملار آصلا نأديپ ياشاپ بيلديلركأ؟ بو مسئله بارده اويلانمان گچمك ممكين دأل. قيات حان هم شئيله آغير ياغدايده اؤز ايلدشلرينينگ اقبالينه اولي جوغاپكأرديگيني بيليأردي.

روسلار بو گزك هم يموتلارينگ خواهشلاريني رد اديپديرلر.

 

  ايرانينگ پادشاسينينگ، قيات حاني ايرانينگ بهبيتـلرينه خدمت اتديرجك بولماق سينانشيغي پوچه چيقيار. اول حيله گأرليگيه باش قوشوپ، قــيات حـــانه " توركمن هم يموت حالقينينگ حاني" ديئن مرتبه سيني ايكينجي گزك باغيش اديأر.

 

1837- نجي يئلده قيات حان خزرينگ كنارينداقي توركمنلري اؤز رعيتينه قبول اديپ، اولاري ايرانلي عملدارلارينگ زورلوغيندان قــُوراماغيني سوراپ، شول توركمنلرينگ آديندان يئنه بير گزك اورسيت حكومتينه يوز توتيار.

قيات حان شول گزك ژنرال پروسكي-أ ايران شاسينينگ اؤزونه داقان حانليق مرتبه سينه قووانيانديغيني، اگر اؤز حالقينينگ اقبالينه پيداسي بولماسه شول مرتبه دن گچمأگه تاييارديغيني يازيپدير:

" من حانــليـق مرتبه دن گچيپ، روس يولباشچيلارينينگ بلــّه يشينه گؤره يؤنه بگ بولوپ قالماغا و اؤز نسليم هم اؤز رعيتيم بيلن روس امپراطور دولتينينگ حواندارليغي آستينده عمرباقي بولماغا راضي".

 

  اورسيت حكومتي يئنه- ده ساپالاق آتيپ، قيات حانينگ خطينه آچيق جواب برمأندير.

 

چلكن آداسينده ياغداي چيلشيريملانيار

 

 27-1826–نجي يئللارداقي ايران- روس اورشي وقتينده، چلكن آداسينينگ سؤداسينينگ اؤسمگـي نتيجه سينده قيات حانينگ آد-آبرايني حاص هم آرتيپدير. ايران حكومتي قيادينگ حاوپيندان قورقوده ياشاپ، اونونگ كله سيني گتيرنه ايسلأنيني برجكديگيني وعده بريپدير. يؤنه روس حكومتي قيادينگ جانيني قوراماق اوچين هيچ بير چأره گؤرمأندير.

قيات حان عمرينينگ سونگلارينده، تاقمين 1842- نجي يئلدان باشلاپ، روس حكومتينينگ اونونگ ادن حيذماتلاريني ياتدان چيقاريپ، ايندي ياشي اؤتوشن قوجه قيادينگ كأن بير پيداسي دگمه جكديگينه گؤز يتيريپدير. روس سؤديگأرلري بولسا اپسلي وقتلاپ، ساتين آلان ماللارينينگ بهاسيني توركمنلره تؤلمكدن بويون قاچيريپديرلار.

شئيله ياغدايدان پيدالانان قيات حانينگ دوشمانلاري، ميرباقروف آدلي تأجري اؤلدوريپ، اوني قيات و چلكنلــي توركمنلرينگ اوستونه آتيارلار. دوشمانلارينگ آيداني بولوپدير. روس پادشاسي بو ايشده الينينگ بارليغي بيلن قيات حاني عـيپلاپدير. قيات حان بو ايشده گناسينينگ يوقديغينه جان اتسه- ده قـفـقاز حكومتي ائنانماندير. سونگرا چلكنلي توركمنلرينگ قايق و گأميلري اوچدان توتما ياقـيـليـپدير. قيات حان بو ايشينگ، چلكنده ياشايان روسلارينگ ادن-اتديليگـي نتيجه سينده بولانديغينه دوشونيپ، بير گون حاقيقاتينگ آيدينگ بولجاقديغينه بيل باغلايار. 1842- نجي يئلينگ سپتامبرينده قـفـقاز حأكمينه يازان خطينده روسلارينگ چلكنلي توركمنلره رحمسيز جزا بريشلريني جيكمه- جيك گوررونگ بريأر و اولاري عدالاتلي بولماغا چاغيريار. اما روس حكومتي اوزالام آيديپ گچيشيميز يالي شو ايشينگ حاقيقي ياغدايني بيلجك هم بولماندير. اوسته سينه قـفـقاز بؤلومينينگ باشليقلاري دينگه ايران ايلچيسينينگ، قيات حانينگ اوغلي ياغشي محمد، " توركمنلرينگ تالانگچيليقلارينينگ ميداما اساسي باشتوتاني بولوپ، دينگه ايرانليلاري دأل- ده، روس امپراطورينينگ رعـيتلرينه هم زورليق اديپدير" دييپ برن يالان خبرينه اساسلانيپ، اوسته سينه روس سؤديگأري گراسيموف-ينگ اؤلدوريلمگيني قــوران هم ياغشي محمد اوي اديپ، شبهه لنيپدير و شوندان سونگ روس پادشاسي هم پوغـتـالـيقـده گؤره لده گؤركزمك اوچين، هم توركمنلرينگ آراسينده آسوداليغي برقرار اتمك اوچين!! ياغشي محمدي توتوپ، اورسيدينگ حكومتينينگ كنترولينده ساقلامالي دييپ بويروق چيقاريار.

 

بندي ليكدأكي آجي گونلر

 

  قـفـقازينگ حاربي حأكيمي گولوين Golovin اوسيت پادشاسينينگ ياغشي محمدي توسساغ اتمك باراسينداقي بويروغيني يرينه يتيريپدير. ياغشي محمد توسساغ اديليپ باكو گتيريليأر. 1842- نجي يئلينگ 16-نجي دسامبرينده گرجستانينگ فرماندارينه برن تابشيريغينده، باكودان تفليسه گتيريلن ياغشي محمده برك گؤزگچيليك اديلمگيني و شبهه لي ياغداي گؤريلن ياغدايئنده چالتليق بيلن خبر برمگيني حكم اديأر. ياغشي محمدينگ توسساغ اديلمگـي يرسيز دألدي. اول قوجالان آتاسينينگ يرينه آدانينگ اركيني اؤز الينه آليپدي. بو بارده 1838- نجي يئلده قيات حانينگ قـفـقاز حأكمينه يازان خطينده اؤزونينگ قوجالانديغيني و آدانينگ اركيني اوغلي ياغشي محمده گچيرنديگيني خبر بريپدير. 1821- نجي يئلده قيات حان ياغشي محمدي تـفليسدأكي آسياليلار اوچين يؤريتـه آچيلان مكتبه اوقووه ايبريپدي و اوني گلجكده اؤز يرينه گچمأگه تاييارلاپدي. ياغشي محمدينگ، آذربايجانينگ گؤرنوكلي شاهيري ميرزا فتحعلي آخوندزاده بيلن ساپاقداش بولانديغي آخمال.

اورسيت حكومتي قيات خانه ادن بو عدالاتسيزليغي بيلن چأكلنمأن، اونونگ اؤزينه هم جزا برمگيني نيت اديأر.

شول نيت بيلن بير مكر حيله قورليپدير. قـفـقازينگ حاربي حأكيمي ايكي يوزليليك اديپ، قيات خانه روس پادشاسينه مهمانچيليغا بارماغا چاغيريش اديپدير. قيات حان بو مكري آنگمان، شول چاقيليغا بگه نيپ، اوني قبول اديپدير.

اوغلينينگ يالنگيشليق بيلن توسساغ اديلنديگيني و اوني اسيرليكدن بوشماتماغي يؤره گينه دوون قيات حان، باكو باريار. يؤنه اول هم بنديليكده ساقلانيار. شئيله ليك بيلن 1842- نجي يئلينگ 12- نجي دسامبرينده قيات حان، ياغشي محمد و حيذماتكأرلري(دردي محمد) باكودان تـفـليسه گؤنده ريليأر.

 حان تـفليسه بارانده اولي توتوم بيلن دابارلي قارشيلانيپدير. اونگا اؤز باشينه آيراتين بير حاشاملي جاي بريليپ، حورماتلانـيـپدير. يؤنه اونونگ داشينه " حورمات" قاراول هم قويوليـپدير.

ياشي اؤتوشن، سيرقاو قيات حانينگ اؤز يوردينه قايتماغا روغصات سوراپ انچمه گزك يوز توتانديغينيا قارامازدان، اونگا اؤيونه قايتماغي روس تأجرينينگ اؤلدوريلمگـي بارداقي ايشينگ درنگوي قوتاريانچا قاداغان اديليپدير.

چلكنلي توركمنلر اؤز آق ساقغاللارينينگ داشي قاراويللي ياتانديغيني اشيدنلرينده، روس پادشاسينينگ عملدارلارينينگ بو اديشلرينه گنگ قاليپ، قيات حانينگ اؤز اؤيونه قويبريلمگيني سوراپ، اورسيت حكومتينه عرض اديپ باشلاپديرلار. پادشاه حكومتي اولارينگ عرض-شكاياتلارينه ساويق قانليليق بيلن قاراپ، اگر توركمنلر قيادينگ يرينه ايكي آدمي ضامونه ايـبرسه لر، شونده اول اؤيونه قويبريلر ديپ، جواب بريـپـدر. چلكن لي لرينگ بير توپاري اؤز آق ساقغالـلارينينگ ايشي چؤزوليأنچأ، اونونگ يرينه توسساغـليقده اوتورماغا گؤوينجنگ بولوپدير. اما اوندا- ده قيات اؤيونه ايبريلمأندير.

ايشينگ درنگــوي اوچ يئللاپ اوزاغا چكيپدير. مونينگ اوچين شونچا وقت صرف اديليپ، انچمه كاغذ قارالانيپدير، يؤنه حاقيقاتينگ اوستي آچيلماندير.

   شئيله ليك بيلن 90 ياشـينگ ايچينده، قيات حان آراسسه وجدانينه يؤنگكه لن قاراني آيريپ بيلمأن، 1843- نجي يئلينگ مارچ آيينينگ اورتالارينده 89 ياشينگ ايچينده، اؤز عـزيز وطانيندان اوزاقده، شرين جانيندان آيريليپدير.

قيات حانينگ كيچي اوغلي آنه محمد(قاراشحان) هم تـفـليسه اؤز آتاسينينگ يرينه ضامونه گيديپدير. اول " كامنتس- پودوسك" ديئن شهرينگ سربازخانه سينه ايـبريلـيپدير.

1844- نجي يئلينگ 17- نجي اكتبرينده قيات حانينگ اوغلي قديرمحمد 3 ساني اوغلان بيلن تـفـليسه باريار. بو اوغلانلاردان ايكيسي ياغشي محمدينگ 12 ياشلي اكيزلري اسن محمد و آنه محمد اوچونجيسي بولسه قديرمحمدينگ اؤز اوغلي نظرمحمددي. قديرمحمد آتالارينينگ مزاريني زيارت اديپ 1845- نجي يئلينگ ژانويه آيئنده اوغلانلار بيلن چلكنه دولانيپ گليأر.

 زندانده اوتورمالي دييليپ ايش كسيلن ياغشي محمد بولسه قاچيپ سيپـيدير. اما 1945- نجي يئلده اوني يئنه خزر دنگزينده روس گأميسينينگ عسگرلري توتوپدير. شوندان سونگ اول " وارونـژ" ديئن شهره سورگون اديليپدير. اول جمعي 7 يئل زندانده اوترويـپدير. يازان عرضه لارينده اوغلانلارينينگ اورسيته گتيريليپ اوقاديلماغيني ياغشي محمد سوراپدير. ياغشي محمدينگ 3 ساني اوغلي 1945- نجي يئلينگ يازينده سانكت پطربورگينگه گتيريليأر(حاص دوغروسي گرو حؤكمينده) و شول يئلينگ 12- نجي ماي آيئنده بو شهرينگ حاربي مكتبده اوقوو آلينيار.

بو اوغلانلارينگ ايكيسينينگ عمر طنابي اير قيريليـپدير. 1845- نجي يئلينگ دسامبرينده ياغشي محمد اوغلانلاريني گؤرمك اوچين پطربورگه گيدمأگه روغصات سورايار. اما خواهشي قبول اديلمه يأر. 1847- نجي يئلينگ 22- نجي مارچ آيئده اول اؤز اوغلي اسن محمدينگ آغير سيرقاولانديغيني اشيديپ، اونونگ اوقويني دوام اتديريپ بيلمه جكديگـي حاقده  و كسليني بجرتمك اوچين اؤز يانينه(وارونـژه) ايبريلمگيني خواهش اديپ عرضه يازيار. بو هم قبول اديلمه يأر. سونگرا 1847- نجي يئلينگ 9- نجي آپريلينده اسن محمدينگ اؤلنديگـي خبر بريليأر.

اوغلانلاردان نظرمحمد بيلن آنه محمد حاربي مكتبي تماملايارلار. اولار « بلگورود» شهرينه قوللوغه ايبريليأر. اما نظرمحمد 1856- نجي يئلينگ ژوئن آيــئـنده شـول يرده آرادان چيـقــيار. اوچ اوغلاندان دينگه آنه محمد قاليار. شول هم قيات حانينگ نسللريندن شاخه آيران يمودسكيلرينگ دويبوني توتيار، اؤزي هم 1886- نجي يئلده سرهنگ درجه سينده شاه قدمده آرادان چيقيار.

ياغشي محمد بولسه 1849- نجي يئلينگ 16- نجي ژوئن آيئنده، 43 ياشينگ ايچينده گومورتيك ياغدايده زندانده اؤليأر.

قيات حانينگ بئيله كي اوغلي قديرمحمد بولسه آتا و دوغانلارينينگ بئيله آغير گونه دوشمگينه چيدامان، سونگاباقا تأثيرلي ايچگيلره يوز اوروپدير. اول آشير آداداقي روس حاربي- دنگيز قرارگاهينده دريابگـي قوللوغينده گزيپدير و كؤپلنچ چلكن آداسينده ياشاپ دير. قاديرمحمد 1868- نجي يئلده 61 ياشده دونيأدن اؤتيپدير.

انگليس دولتينينگ استراباده ايبرن ايلكينجي كنسولي كاپيتان مكنزي 50 ياشان قديرمحمد بيلن آشير آداده دوشوشيـپدير. اول بو بارده شئيله يادلاما قالديريپدير:

 

" قـديرمحمد، دنگيزده قاراقچيليق اديأن توركمنلرينگ اؤنگوني آلماق اوچين روسلاره ياردام بريأر. توركمنلرهـرآدمي اسير آلسا، قديرمحمد، روسلاره جريمه برمأگه مجبور اديليپدير. شونگا گؤرأ اول بو پولي تاپماق اوچين، روسلار بيلن سؤودا اتمأگه حاقي بولان هر توركمن قايقچيسيندان 6 بيلن 16 قران آراسينده سالغيت آلماغه روغصات آليپدير. يؤنه اول قــوري يرده اسير بوليانلاره جوغاپكأر دأل. اونونگ بيرنأچه اوغلي بار. كؤپ ايچگـي ايچيأر. قديرمحمد «جريكو» ديئن آدانينگ هم سالغيديني يئغناماغا حقوق قازانيپدير. اول يردن قديرمحمد روسلارا نفت و دووز گتيريأر". ( كتابده قديري خضر دييپ گتريپدير.سفرنامه شمال. مكنزي. ترجمه منصوره اتحاديه. نشر گستره تهران 1359)

 

  اورسيت حكومتي، قيات حانينگ بيترن حيذماتلاريني تيز ياتدان چيقاريپ، حتي چلكنلي توركمنلري ايرانه تابين بولماغا ائرجاق بولوپدير.

شول دؤورينگ اونگده باريجي آدملاري قيات حانينگ فهم-پايخاسينه، قوجير-غايراتينه هم دوغومليليغينه مناسب بها بريپديرلر. روس ساحاتچيسي نيكولاي موراويف اؤز ايشدش- كأردش يولداشلارينه گزك گلنده آغزينده اؤگولي سؤز اشيديپ بولمايان آدمدي. اما شولام قيات حاني أهلي باشارجانگ-ليغيني توركمن حالقينينگ آرزولاريني يرينه يتيرمأگه گؤنوكديرن بيچاق قوجيرلي هم عاقيلـّي آدم حؤكمينده صوراتلانديريپدير. اول قيات حان باراده :‎" آصلا صحراده اؤنيپ-اؤسن شو آدمينگ عقـل- پايخاسينه هم اوقوبينه(استعداد- ukip ) حيران قالايمالي" دييپ يازيپدير.

قيات حانينگ خزر ياقا توركمنلرينگ دورموشينده اوينان جمعيتچيليك-سياسي قايراتينه بها بريلنده، اونونگ حقيقي اؤسوش بولانديغيني اقرار ادمك گرگ. اول اؤز حالقيني قيرغينچيليقدان قوتارماقدا و اولارينگ مادي حال- ياغدايئني سازلاشديرماقده أگيرت ايش بيتيريپدير.

  قيات حان آرادان چيقاندانسونگ چلكن آداسيني اونونگ كيچي اوغلي قديرمحمد دولانديريپدير. يؤنه 1865- نجي يئلده روس حكومتي آدانينگ كنترليني اؤز الينه گچيريپدير.

 

قيات حانينگ ماشغالاسي نأمه اوچين بئيله تراژديك ياغدايا دوچار بولديقا ؟

 

  بيزينگ فكريميزه گؤره اونونگ ايكي ساني اساسي سبأبي بولمالي:

 

1- قيات حان و اونونگ اوغوللاري تـزاريسم رژيمينينگ طبيغاتينه دوشونمزدن، اونونگ " آصيلـّي" حأصيتلرينه كؤره- كؤرليك بيلن ائنانيپديرلار. البته مونينگ اؤزي گنگ دألدي. شول دؤورده اترك- گورگن توركمنلري ايرانينگ ظلمينه قارشي گؤرشده دايانار يالي گويجه محتاچديلر. شئيله گويچ بولسه خزرينگ آنگير طاراپيني، بوتين قـفـقازي ايه لأن، ايران بيلن حألي- شيندي اورش اديأن اورسيتدي. شو اساسده هم 1813- نجي يئلدان باشلاپ اترك- گورگن توركمنلري اورسيت بيلن اوغري بير ائسناشيپ گيديـبرديلر. ايزلي- ايزلينه ايران قشونيني يئنگن روس قشونينينگ حايباتيني گؤرديلر. توركمن ياشوليلاري بيرنأچه گزك قـفـقازه، آستراخانه(آژدارخانه) گيتديلر. اونونگ باشينده بولسه قيات حان دوردي. يؤنه اولار شول وقـتـقي سياسي ياغدايه گؤز يتريپ بيلمأنديرلر.

1837- نجي يئلده تـفـليسه گلن روس تزاري 1- نجي نيكولاي بيلن ايران شاسي محمدشانينگ اترك- گورگن توركمنلرينينگ ايرانينگ رعيتـينده قالماليديغي، اولارا جزا برمكده ايكي " دوست دؤلتينگ" آرقالاشيق اتمليديگـي بارده ائلالاشانديقلاريندان، توركمنلرينگ، شول سانده، قيات حانينگ هم خبري يوقدي. ايكي پادشاه اترك- گورگن توركمنلرينينگ بهـبـيتـلريني، اولارينگ تاريخي اقباليني بير بلغور چاقـير ايچيپ، چؤزيپ قويـبرديلر. اونسونگ هم پادشاه دوزگوني هيچ حاچان حالقينگ بهـبيديندن اوغور آلماغي، اونگا حورمات قويماغي اؤرنمأندي. همه زاتدان يوقارده اونونگ دينگه اؤز بهبيدي دورياردي. شو زاتلارا دوشونمزليك قيات حان و اونونگ اوغوللارينينگ گناسي دأل- ده، يتمزچيليگيدي.

 

2- قيات حان و اونونگ اوغوللارينينگ چلكنده، اساسان بو يردأكي توركمنلرينگ آدانينگ بايليقلاري بولان باليق، اشبيل، نفت، دووز و بوياغ يالي سؤوداسيني اؤز اللرينده توتماقلاري، ايراندير اورسيتينگ بهبدينه قارشي بولياردي. بو ايكي دؤلت موندان آرتيق توركمنلرينگ اؤز اركين بولوپ باياماقلارينه گؤز يوموپ بيلمه ديلر.

 

اما قيات حان هم، ياغشي محمد هم اؤز دؤرلرينينگ اوغوللاريدير. بولارينگ گؤره شينينگ آخرقي قصه لي نتيجه سي بو ايكي آدامينينگ حاقـيقاتدان هم شول دؤرده اؤرأن ايري، اؤنگده باريان فكرلي جمعيتچيليك-سياسي چهره لر بولانديغيني انكار اتمأگه آصلا اساس برمه يأر.

 

بنديليكده يازيلان شعرلار

 

ياغشي محمدينگ زنداندا يازان قـوشغولاري يئغنانيپ، اول حأضير توركمنيستانينگ قوليازمالار ساقلانيان انيستيتوتده (in51) بلليك بيلن ساقلانيار.

قوليازمه عـرب خطينده يازيليپ، 59 صفحه، فورماتي(اندازه سي) 22×17 سانتيمتر. اول قوليازمه 1343- نجي هجري يئلينينگ محرم آيينينگ 15- ينده(1924- نجي ميلادي يئلينده) گؤچوريليپ قوتاريليپدير.

قوليازمانينگ باشينده شئيله ماغلومات قالديريليپدير: « بو قوشغيـني ياغشي محمدينگ زورياديندان چلكنـلي محمد اسن اوغلينينگ كهنه قوليازماسيندان يازيپ آلان شول اوبالي بگ محمد باقي اوغلي. ادبيات اويشمگينه گتريپ برن چلكنلي عبدالجبار غفور اوغلي».

بو قوليازمه باراسينده مرحوم صفر انصارينينگ عيالي عاليم زليخا محمدوا ماغلومات بريپدير.

 

ياغشي محمدينگ قـوشغـولاريندان بؤلكلـــر

 

…آپارديلار مني ياد اولكأ، داشه،

تقديره يازيلان اول ده باشه،

حسردش كاكاجان– يـيگيتلر باشي،

ائنانيپ اؤز اورنوم سانگا تابشيرديم.

 

شو غريب يرده كؤپ چكديم دردي،

فكر اديپ، اويلانيپ مصلحت قـوردي،

جان تؤره هم حليم يـيگيتلر مـردي،

اونوتما، تعـصيـبـيم سانگا تابشيرديم.

 

سؤزلگنده مصلحت- ينگ اوزالي،

كؤپ ديـيديم، يـورولديم بيكار غزلي،

نظر، ساتليق– يـيگيتلرينگ گؤزلـي،

موافـق ايلاتيم سانگا تابشيرديم.

 

گچيرديم گؤونيمدن مونچه خياليم،

يايناپ قالدي منينگ اهـل و عياليم،

جانه مرهـم نظر، شول قـولي حانيم،

اولاديم، كلفتيم سيزه تابشيرديم.

 

يكه ليكدن چكديم كؤپ غصه دردي،

جانيمينگ آرامي شول نؤكر دوردي،

ياتدان ياقين بولان شول الله بردي،

اوسساليق ايشيمي سيزه تابشيرديم.

 

شو درددن قوتارسه ايا بيروبار،

الاهيم عفو اتسه شول پروردگار،

كلفت وارسته سن- سن عياللار،

كلفتيم، جگريم سانگا تابشيرديم.

 

مقصديم كؤنگلومده، ديليمده حأضر،

روحم روان بولوپ، اولكه ده گزر،

دوغان دايئم منينگ شول آمان نظر،

خوستاريم، زاريمي سانگا تابشيرديم.

 

يتيشمز بو يردن داد و فرياديم،

توكنمز مهلتم، شول كؤنگول آهـيم،

غافـل قالان منينگ شول بابا دايئم

جانلاريم، جگريم سيزه تابشيرديم.

          ***

 

 

خـوفيم كأن حياتـلاري

آيتسام كأندير آدلاري

اسنقـولي يتيگيتلري

تلاش ادينگ بو يورت اوچين!

 

حيرانه قاليپ دوردونگيز،

بولان ايشلري گؤردونگيز،

بو سفر مني بردينگيز،

ال گؤترينگ، اؤزباش بولمانگ!

 

ايلينگ ياغشيلاريني گؤرينگ،

فكر اديپ، مصلحت قـورينگ،

من بارينچا آرام بولونگ،

بيزار بولمانگ سيز يورتـدان!

 

اوزال جانينگيز بردينگيز،

حيرانه قاليپ دوردونگيز،

اوجـوندان بيرين گؤردونگيز،

پوچـدير بولارينگ آخري!

 

ياغشيسي- ياماني حايسيـلار،

بو يوردي بــُوزان عاصيلار،

تكبيري كأن صوفيـلار،

اخلاص ادينگ سيز يورت اوچين!

 

صوفيلارينگ پألي آزيـپدير،

ياماندان اولكه دولوپدير،

آخر زمانه گليپدير،

اخلاص ادينگ اول يورت اوچين!

       ***

ناحق يردن گيتدي بو شيرين جانيم،

غـافل ليقدان بيلمأن ديري آيريلديم،

اخلاصـلي ابراهيم، حامراق دوغانيم،

غايرات ات، هيچ كيمه محتاج بولماغين.

 

قـويوپ اولكه، ياد يرلرده قالانيم،

اجيزلأپدير كؤنگليم هم جانيم، ديليم،

آتش بيلن شيخي، دوغان يگــه نيم،

كؤپ زارلار شو كؤنگليم سيزي گؤرمأگه.

 

اول باشدان ياشليغيندان ساقلانيم،

حالــّي، صالح، ايكي كؤرپه دوغانيم،

شوكـور حان، سرحوشليق، صاحبـكار بگيم،

غايرات ادينگ، هيچ وقت غمگين بولماغين.

آخ شو غريب يرلرده منينگ ديله گيم،

قالقـينيپ، قوانيپ گزن دوغانيم،

روشنيم، چراغيم، شيريم، پلنگيم،

گلدي محمد قرداش، غمگين بولماغين.

          ***

 

آخ، مونچه وقتلاپ زندانده ياتديم،

مونگاليپ، علمينگدان كؤپ اميد اتديم،

جانيمينگ تاراسي، شول ملا ساتليق،

منينگ اوچين كؤپ يالبارغين خدايه.

          ***

 

دوست بيلن دوشمانيم بولديلار عيان،

كيمدير منينگ خاطرامني ساقلايان،

حورماتغه مناسيب، شول ايلگـلدي حان،

اونوتما، هر زمان ياد ايله مني.

 

گيره دوشديم رجب آيي،

آيريلديم ايلدن جـدائي،

دنگيم- دوشوم، آقا-انيم،

كأ- كأ ياد ايلأنگيز مني.

     ***

اميديم الله دان، يارادان حـقدان،

ناچاريم سويشه جان طماعيم كؤپدير،

سندن آيري كيشيدن طماعيم يوقدير،

سن هم مني اونوتدينگ- ده، نيلأيين.

      ***

 

اوتوز يـئـل قوللوغيميز يـيتدي،

محمدشاه ديه نين اتدي،

بيزني شو گون آلداپ توتدي،

راضي بولونگ دنگيم- دوشوم.

        ***

دأده سي قيات حانينگ اؤلومينه باغيشلان سطرلري

 

آغلاي- آغلاي گؤزي كؤر بولدي،

«اولي ايلي گؤرمه ديم» ديپ، زار بولدي،

شولارينگ سونگكـلر تـفـليسده قالدي،

گؤتــره بيلمه ديم، اظهار ايلأيين.

 

آخرت ايزاسين من شوندا چكديم،

قارداشيم گلر دييپ، كؤپ يوله باقديم،

شولار اوچين اللي تومن خرج اتديم،

گؤتــره بيلمه ديم، اظهار ايلأيين.

آيتماغه وصيت بارسيني دييدي،

«اوغلوم خـدر» دييپ، زارين انگـره دي،

اوچ آيلاپ، «گلر» دييپ گؤزلــدي،

ناراضيليق اتدي، اظار ايلأيين.

    ***

 

ملالار يئغديريپ، مدرسه قوردوم،

غملي كؤنگلين، خسته حالين سوراديم،

يتيمــلرگه خيري- احسان قيلديم،

پيداسيني گؤرمــأن گيتملي بولديم.

          ***

 

قــوشماچـــــالار

 

ايران اردوسينينگ كميش دفأ اوغـراديليشي. اوغورجالي توركمنلرينگ ياشوليلاري بيلن دوشوشماغـي(سازمان اسناد ملي ايرانده ساقلانيان سندلردن

                             روزنامچــه  اردوي دولتي بتاريخ چهارشنبه نهم شهر جماديالثاني

قشون نصرت نمون بحمدالله در كمال صحت ميباشند، امري اتـفاق نيافتاده مگر نيم ساعت بغروب مانده تـفنگـداران حامل تنخواه وارد شدند. روز پنجشنبه ريش سفيدان طايفه اغـورجلي آمده بودند، بدانها خلعت داده اميدوار كردند كه بروند ساير طايفه را اميدوار كنند. دگر تازه كه قابل عرض خاكپاي مبارك باشد نبود.

ايران قشونينينگ توركمنلري يئنگيشيني اورسيت و فرانسه نينگ تهرانداقي وكيللرينينگ قوتلانديغـي، ينگيش اوچين توي توتماغه باش- وزيرينگ پادشاهـدان روغصات سوراماق باراسينده (سازمان اسناد ملي ايرانده ساقلانيان سندلردن)

 

قربان خاكپاي جواهر آساي مبارك همايونت شوم

امروز سه ساعت بغروب مانده را جناب وزير مختار روس و شارژ دفر فرانسه محض تهنيت فتح اترك و كموش تپه كه جناب سپهسالار نموده اند بديدن خانه زاد آمدند… حرف نمودند خيلي خوشحال بودند از جهت فتح هايي كه شده است و زياد گشاد داشته و از خانه زاد خواهش نمودند كه محض شكرانه اين فتح هايي كه شده است ما يك مهماني خوبي را … بدهيم ولاياتي و خود مبارك سركارشاهنشاهي خوشي بكند… زياد مسرور باشيم خانه زاد هم قبول نمودم لازم دانستم مراتب را بعرض همايون برسانم كه اگر مرخص ميفرمايد در  همين خيمه شبها مهماني… بدهم و هم را در باغ سپهسالار… وجود شاهنشاهي خوشي بكند … وزاري ايراني هم وزير امور خارجه امين الدوله را هم دعوت كنم…. چون قبول اين تكليف را از آنها كه نموده خانه زاد كردم …بعرض رسانيدم. امر امر همايون است.

 

… اوقاپ بولماديق يرلر

اسير آلنان توركمنلرينگ اقبالي باراسينده، باش وزيرينگ آستراباد حأكمينه يوللان خطي( سندينگ بيرينجي بؤلومي آستراباد قشونينينگ تاييار بولوپ دورماغي حاقينده بولاني بيز سندينگ اورتاسينداقي بؤلومدن آلديق. سازمان اسناد ملي ايرانده ساقلانيان سندلردن)

 

مكرما

….

درباب اسراي تركمان كه مقرر شده است چند نفر از جوانان آنها بخادمان حرم داده شود در آن باب اقدام شده بود صورت آنهم نزد شما هست بعرض حضور همايون هم رسيده موافق همايون … بهر قسم كه مقرر فرموده اند بخادمان حرك از جوانان اسرا بدهيد و هر قدر از آنها را كه به اندرون ميبرند صورت آنرا نزد اينجانب هم بفرستيد كه مستحضر باشم.

 

اؤنگ كؤشكده اسير بولوپ ياشايان دوستي و قووانچ آدلي توركمنلرينگ اسير آلنان بو توركمنلري اؤز يانلارينه آليشلاري، و بو اسيرلري اولارينگ اليندن آلينماغي باراسينده، شونينگ يالي- ده پادشانينگ ساوغات بريلن اسيرلرينينگ باشغالاره ساتيليشي حاقينده پادشاه بريلن راپورت (گزارش) سازمان اسناد ملي ايرانده ساقلانيان سندلردن

 

قربان خاكپاي جواهرآساي اقدس همايونت شوم

دستخط همايون اقدس اعلي كه در باب كمترين غلام محسن مهتر

اسراي تركمان كه دوستي و قونچ خريده اند… يافته بود كمترين غلام فورا فرستاد كه از خانه ايشان اسرا را گرفته بياورند و خود دوستي كه جلودار اصطبل است تنبيه شود و قونچ را هم كه نوكر ديگري است بياورند تنبيه شود اينها كه اسير خريده اند تنبيه لازم دارند كه عبرت ديگران شود تا بعد ازين چنين جسارت نكنند. تنبيه كلي هم اشخاص كه اسير مرحمتي را فروخته اند لازم دارند نهايت رذالت و هرزگـي است كه پول بگيرند و اسير مرحمتي را بفروشند. باعتقاد كمترين غلام كه زن و بچه چنين بايستي بتركمان بايد داد و چنين مشتري را البته در اين نوع كارها بايد كمال مراتب… اگر جزئي ميآيد لكن در معني بسيار كلي است خداوند عالم دشمنان اعليحضرت شاهنشاه معظم روحي روح… فداه را هميشه اسير چاكران و بندگان نمايد و دين و دولت را بفر وجود مسعوده اقدس اعلي پاينده بدارد. آمين آمين

 

قيات حان

  (1843-1754)

ياغشي محمد                                         قديرمحمد

    (1849-1806)  

                                                                                          اسن محمد            آنه محمد                   نظرمحمد

                                                                                                                 (1886-1829)

                 

حان يموتسكي(لألي حان)

(1928-1868)

قاراش حان

قيات حانينگ شجره سي

بو شجره ني كاميللشديرمك اوچين قيات حانينگ فاميلياسيندان ياردام سوراياريس.

قيات حانينگ اوغوللارينينگ، يوزينه آتينگ صوراتي چكيلن       يؤريته مهرلري بولوپدير.

 

 

پيدالانيلان چشمه لر

 

1-        نورمحمد رحيموف: سيز توركمنيستان باراسينده نأمه بيليأرسينگيز؟

      مغاريف نشرياتي. آشغابات  1991

2-        آ. قـليجوف: قيات حان. علم نشرياتي. آشغابات 1991

3-         مراد آنه نفس: بنديليكده يازيلان شيغيرلار. علم نشرياتي. آشغابات1977

4-         لسان الملك سپهر: تاريخ ايران

5-         اسماعيل مهجوري: تاريخ مازندران. ساري 1345

6-         ج. ف. مكنزي: سفرنامه شمال. ترجمه منصوره اتحاديه. نشر گستره. تهران 1359

 

ايرانينگ ملي كتابخانه لارينده قيات حانينگ دؤورينه دگيشلي شو آشاقداقي چشمه لري ساناسا بولار:

 

1-     فهرست بايگاني راكد وزارت امورخارجه ايران(اسناد، عهدنامه ها و سفرنامه ها) 359

2-     آشورآده و هرات دو كمينگاه استعمار. دكتر وثوق زماني. تهران 1363

3-      سفرنامه ملكونوف به نواحي شمال و درياي خزر. ترجمه محمد گلبن. تهران 1363

4-      تاريخ ايران. سرپرسي سايكس. ترجمه فخرداعي گيلاني. تهران 1330

5-      گرگان نامه. ذبيح الله مسيحي. نشر بابك. تهران 1363

6-     اميركبير و ايران. فريدوم آدميت. نشر خوارزمي

 

مهم تاريخي واقعه لارينگ كرونولوژيسي(روزشماري)

1750- نجي يئل – قيات ينگ دوغليشي.

1813- نجي يئل– ايران- روس آراسينده «گلستان» آدينداقي ياراشيق ائلالاشيغينه قول چكيلمگـي.

1819- نجي يئل– روس كاپـيتاني موراويف- ينگ چلكن و خيوه سياحاتي.

1821- نجي يئل(30- نجي نوامبر)– قيات حانينگ روس درياداري  بارانوفي اؤلومدن قوتارماغي.

1821- نجي يئل– قيات اوغلي ياغشي محمدينگ تفليسه اوقــوو أيـبريلمگــي.        

1826- نجي يئل– روسلارينگ ميچوو برمگـي بيلن قيات حانينگ يولباشچيليغينده توركمنلرينگ تهرانه چنلي هجومي.        

1836- نجييئل– روس رسميسي كاره لين- ينگ چلكنــه سياحاتي.

1837- نجي يئل– مازندران حأكيمي اردشير ميرزانينگ كميش دفه هجومي.        

1837- نجي يئل– قيات حانينگ اورسيئده رعـيت بولماق باراسينده عرضه سيني كاره لينـــه قاوشيرماغـي.       

1837- نجي يئل– روس تزاري بيرينجي نيكولاي بيلن ايران شاسي محمدشانينگ تفليسده دوشوشيپ، توركمنلري قيسماق باراسينده ائلالاشماقلاري.

1842- نجي يئل(12- نجي دسامبر)– قـفـقاز حأكيمي گلووين- ينگ حكمي بيلن ياغشي محمدينگ توسساغ اديليپ ايلكي باكو سونگره تـفليسه گتيريلمگـي.

1842- نجي يئل– قيات اوغلي آنه محمدينگ توسساغ اديليپ «كامنتس پودوسك» شهرينه آلنيپ گيديلمگـي.         

1842- نجي يئل– قيات حانينگ آلدانيپ تـفليسه چاغـريليپ، ضامون ساقلانماغي.

1843- نجي يئل(مارچ آيئنده) 89 ياشينده قيات حانينگ تـفليسده آرادان چيقماغي

1844- نجي يئل– قيات حانينگ اوغلي قـدير(خدر) محمدينگ تـفليسه آقاسي(ياغشي محمد) و دأده سيني گؤرمأگه گليشي.

1845- نجي يئل(بهار)– ياغشي محمدينگ 3 ساني اوغلينينگ پطربورگه اوقوو ايبريلمگــي.

1847- نجي يئل(9- نجي آپريل)– ياغــشي محمدينگ اوغـــــلي اسن- محمدينگ پطربورگده اؤلومي.

1849- نجي يئل( 16- نجي ژوئن آيئنده) ياغـشي محمدينگ گومورتيك ياغدايده « وارونژ» شهرينگ زندانينده 43 ياشينده اؤلومي.

1856- نجي يئل(ژوئن آيئنده)– ياغشي محمدينگ اوغلي نـظرمحمدينگ19 ياشينده « بلگـورود» شهرينده اؤلومي.         

1968- نجي يئل– قيات اوغلي قـديرمحمدينگ 61 ياشينده اؤلومي.

1924- نجي يئل– ياغشي محمدينگ زندانده يازان قـوشغـولارينينگ قايتادان يازيليپ، سونگره توركمنيستانينگ قوليازمه لار فوندينه قاوشيريلماغي.