توركميستانينگ قاراشسيزليغنئنگ 12 يئللیغنا  

عمومى قارايئش/ گيريش حؤكمينده

2003- نجى يئلينگ 27- نجى اوكتيابريندا توركمنيستانينگ اؤزاركين دؤولت استاتوسينا ايه بولانينا تگه لك 12 يئل دوليار. دونيأ جمعيتچيليگـىنينگ بارها گلوباللاشيپ، اؤسوشه بادلى دپگينلر بيلن گيديأن بير دؤورده، توركمنيستانينگ- دا اؤسوش-اؤزگريشه گيدمكده 12 يئل البته آز واقت دألدى. شوروی دارغاپ، توركمنيستان بيلن بير اييامدا اركينليگينه قاوشان كأبير دؤولتلر شول ساندان بالتيك اولكه لرى اؤز حالقينا اونگات ياشايئش قورماغا سينانشيپ گليار. اولار، توركمنيستان يالى يرآستى و يراوستى بايليقلارا- دا ايه دأل. يؤنه قينانساغام توركمنيستاندا بئيله بولمادى. شو ماقالانئنگ اونس مرکزینده سونقی یوز بران مهیم واقالار دورماسادا، کوپ طاراپلایئن تورکمنستانئنگ قاراشسیزلیغنا دگیشلی تماتیکا اوندا آنالیز ادیلیار.

 

قاراشسيزليق نأحيل حاصيل بولدى؟

1991- نجى يئلينگ مارت آيئنداقى سس بريلشيكده بيزه سايوز گره ك ديديرن توركمنيستان كوم پارتياسىنينگ 1- نجى سكره تارى ساپارميرات نيازوف، سونگرا آگوست آينداقى گ پ چ پ- ه واقعاسيندا بو آوانتوريست حركتى قولدادى، حاص دوغروسى، سياسى آقيم بيلن بيله آقيپ گيتدى . ديمك اديل شول 91- نجى يئللاردان باشلاپ، جناب نيازوف حالقىنينگ اقبالى بيلن شئيله آنگسات اويناپ بولجاغينا گؤز يتيردى. مسکوداقى گ پ چ باردا دوغرى ماغلوماتى حالقدان باسيريپ ساقلاماق اوچين توركمنيستانينگ كؤپچوليكله يين حابار بريش سريشده لرى دينگه اونى قولداپ چيقيش اتديلر، بئيله كى فكرلرى برمكدن قاداغان اديلدى. توركمنيستان بيلن آراچأكده ياشايان توركمنلرينگ آيتماقلارينا گؤرأ، حتى توركمنيستان تلويزيونى بيرگونلأپ گپله شيگينى توغتاديپدير. توركمنيستان تله كاناليندان هيچ زات گؤرونمأندير. ايندى اول يوردينگ ايچينده- ده شئيله بولوپدى يا- دا بولماندى اونى بيلمه ديك (ايرانينگ كيهان نشرى 91- نجى يئلينگ20- نجى آگوست سانى).

آگوست آينداقى پوچ دان سونگرا شوروی نئنگ أهلى كونجه گينده بوليشى يالى، توركمنيستاندا- دا سياسى حركتلر گويچله نيپ، حاص مؤوج آليپ اوغرادى. 90- نجى يلينگ اورتالاريندا دؤره ديلن آغزى بيرليك حالق حركتى آدلى سياسى حركت، توركمن ديلنه دؤولت استاتوسى/ حقوقى بريلمگـى اوغروندا برك طالابلارى اورتا آتدى. ملى ايسلگلرينگ حاصيل بولماغينى اوغروندا باتيرغاى گؤره شه باش قوشان قورامانينگ حاطارى بارها بركه يأردى. سونگرا 7 سانى سياسى حركتدن عمله گلن گنگش فرونتى، نيازوف و اونونگ دؤولت آپاراتىنينگ وظيفه باشلاريندان چتلمشگينى طالاب اديپ، ايسلگلرى حاصيل بوليانچا مختومقلىنينگ يأديگأرليگـىنينگ يانيندا آچليق ايغلان اديأنديكلرينى معلوم اتديلر. بو حركتدن جوشا گلن توركمن اينتلله گنتسيا وكيللرى، گليپ پارت بليطلرينى يرتيپ، اؤزلرىنينگ حالق گؤره شينه قوشوليانديقلارينى معلوم اتديلر. البته اولارينگ كأبيرلرىنينگ حأضير هم شول رژيمه قوللوق اديأنلرى- ده بار.

  اوكتيابر آيى ياقينلاشديغچا، ملى مدنيتينگ و توركمنينگ ملى كيمليگـىنينگ اؤسدوريلمگـى، 70 يئلينگ دواميندا يوق بولماق حاوپـينا يتيريلن ملى ميراثيميزى ديكلتمك اوغرونداقى ديسكوتسيالار، يئغناقــــلار، ميتينگلر، حتى يؤنه كى حالقينگ آراسينداقى صاداقا- ضيافت دابارالارى- دا بارها اؤسيأردى. آكادميانينگ هر بير زاليندا ديين يالى يازيجيلار حالقا يوزله نيپ چيقيشلارى يولا قوييارديلار. آخر سونگـى وادالى گون گليپ يتدى. شونليق بيلن 1991- نجى يئلينگ 27- نجى اوكتيابريندا توركمنيستان اؤز ملى قاراشسيزليغينا قاوشدى.

  كوم پارتيانينگ باش سكره تارى، حايال ادمأن دموكرات اشگينه گيريپ، كمونيست پارتيانى دارغاديپ، يرينه دموكرات پارتيانى اساسلانديريانديغينى و اونونگ باشليغينا بولسا اؤزىنينگ گچيأنديگينى جار اتدى.

90- نجى يئلينگ 12- نجى يانواريندا گؤك دپه ده شهيد بولانلارينگ حاطيراسينا حداىيولى بريپ، معركه نى چاغيرجاق بولاندا، آغزىبيرليك حالق حركتينى دآران نيازوف، بو گزك بو ايشه اؤزى اؤنگ آياق بولوپ، 1991- نجى يئلينگ 12- نجى يانوارينى شهيدلر گونى دأل- ده حاطيرا گونى دييپ رسمسلشديردى. اونونگ بيلن باغلانشيقلى ادن چيقيشيندا بولسا، اورشدا روسلارام اؤلدى، توركمنلرم اؤلدى، ايندى اولار دوغان بولوپ ياشايار ديين أهنگده داكلاد اتدى.

يوردينگ شول واقتقى داشارى ايشلر مينيسترى عبدى قوليف، 1991- نجى يئلينگ 30- نجى نويابريندا رسمى ساپار بيلن توركييأ باراندا آنادولى حابار آگنتليگينه برن اينترويوسندا شئيله دييپدير: بيز سايوزينگ بيته وى قالماغىنينگ طاراپدارى، بيز بئيله كى رسپوبليكالارينگ- دا ماسكاوانينگ سياساتينا وفالى قالماغينى آرزو اديأريس، توركمنيستان، سايوزينگ بيته ويليگينى ضاربا اورماغى ماقصات ادينمه يأر و توركيه دن توركمنيستانينگ قاراشسيزليغينى اقرار ادمگـى ايسلأميزوق (كيهان تهران نشرى 91- نجى يئلينگ 30- نجى نويابر، 14347- نجى سانى)

قاراشسيزليق يئللارى ايچنده نيازوف گيتديكچه شخصيت كولتينى اؤسدوردى. اوزالى بيلن توركيه جهموريتىنينگ دويبونى توتان و اؤلندن سونگرا توركييأنينگ بييك ملت مجليسى/ پالامنتى طاراپيندان آتاتورك آدى بريلن مصطفى كمال پاشا اويكه نيپ، اؤزينه توركمنباشى ديديرتدى. سونگرا بولسا آتاسى آتاميراد و اجه سى قوربان سلطان- ينگ آدينى عـارشا گؤترتدى. 92- نجى يئلدا قــايتا پره زيدنتليگه سايلان نيازوف، مجليسى دارغاديپ، اونى جوبى پالامنته اؤويردى.(150 مانداتليق مجليسى 50 مانداتا دوشوردى) اؤز دوزديرن كانيستيتوتسياسينى آياق آستينا آليپ، 97- نجى يئلدا گچيريلملى پره زيدنتليك سايلاوينى 2001- نجى يئلا چنلى قايرا سويشوردى، ايندى اونگا- دا راضى بولمان، اوستونه يئنه بير 12 يئل قوشدى.

قاراشسيزليغينگ شو 12 يئلىنينگ دواميندا جناب نيازوف ملى قالقينيش سياستى اساسيندا توركمنلرينگ ملى مدنيتينه اورغى بارينى اوردى. عليملار آكادمياسى ياپيليپ، پاليسيا آكادمياسنينى دؤره تدى. اوپرا و بالت تئاترى، توركمن فيلارمونياسينى ياپدى، اورتا مكتب 9 يئلا اينديريلدى، اولاردا انگليس ديلى ساپاغى ياتيريلدى. توركمن دؤولتىنينگ دويبونى توتان قايغيسيز آتابايف دير ندرباى آيتاكوف- ينگ داش هيكللرينى- ده چكيپ- چيداپ بيلمه ديك جناب نيازوف، كلى توركمنينگ باش تأجى بولان ملى شاهيريميز مختومقولا- دا ديل يتيردى، قاراض اؤزيندن باشغاچا اويلانيانلارينگ آغزينى موملادى.

  1995- نجى يئلينگ 12- نجى اييوليندا حالقينگ پاراحاتچيليقلى يؤريشى زور بيلن باسيليپ ياتيريلدى.  قاراچارشنبه آدينى آلان شول واقعادا بيرنأچه توركمن شهيد اديليپ، انچمه سى اوزاق مهلت له يين تورمأ باسيلدى. تورمه لرده شبهه لى اؤلوملرينگ سانى آرتدى. اوزينى عمرليك پره زيدنت ديديرن ساپارميرات، مونينگ بيلن چأكلنمأن آدىنينگ اؤنگونه اديل روسلار و پارسلارينگ ايمپراطورلارينا آيديلشى يالى بييك سؤزينى قوشديردى. ايران، آوغانيستان و توركيه يالى مسلمان يورتلاردان، دونيأ توركمنلرىنينگ گومانيتار جمعيتينه باران ميخمانلاردان چكينمه ديك بولسا، بلكى- ده قاقاميرات باللىيف-ه اؤزينى پيغمبر دييپ يازديرام ماقالاسيندان سونگرا، پيغمبر آدينى- دا آدىنينگ ايزينا قوشدورجاقدى. البته اول 2000- نجى يئلينگ دكابرينده گچيريلن حالق ماصلاحاتيندا اگنينه پيغمبر دونونينى آتيپ، الينه آق حاصانى آليپ، شول واقتدان پيغمبرليگه دالاش اديپ باشلاپدى، يؤنه ايشينگ بئيله قين بولجاغينى گؤيه جناب نيازوف دوشونمأندى. هرنأ اول حأضيرليكچه بو پأليندن قايتدى.

  شئيله ليك بيلن مختومقلى شاهير آيتميشلاين آياق باش بولدى، باش آياق. بيزه سايوز گره ك دأل- ده قاراشسيزليق گره ك ديينلر، دؤنوك دييلدى، تورمأ باسيلدى، كمسيديليپ حورلانديلار، سايوزسيز ياشاپ بيلمه ريس ديينلر بولسا، قاراشسيزليغينگ آتاسى، ير شارينداقى توركمنلرينگ توركمنباشيسى بولوپ اوتوربردى.

 

توركمنيستانينگ داشارى سياساتى:

70 يئللاپ قيزيل امپرياليزيمينگ ظاليم پنجه سينده ياشاپ گلن توركمنيستان، حأضير بوگونه چنلى مسكو بيلن بار بولان يوپلرى قوپاريپ بيلمأن گليأر. مونگا بيرنأچه فاكتورى سبأپ اديپ گؤركزيپ بولار. بيرينجيدن مسکو اؤز بيروكراتيك سيستماسينى شئيله بير برك اورناشديريپ دير ولين اوندان سيپماق آنگساتليق بيلن باشاردانوق. توركمن تكنوكراتلارى اورسيدينگ علمى مركزلرينده يتيشديلر.

توركمنيستاندا قورلان أهلى فابريك- زاودلارينگ انجاملارى گؤنيدن- گؤنى مركزه باغلاشديريليپ قويولدى. حتى دميريول- ده سونگـى ماسكوا باريپ ديره مه ليدى. نفت- گاز توربالارى متروپولا طاراپ چكيلدى. اؤزينگ سؤزينگ قيسغاسى توركمنيستان گؤزه گؤريليپ، گؤرويلمه يأن تارلار بيلن مسکونينگ قازيغينا اؤركلندى.

ايكينجيدن بولسا توركمنيستانينگ يرلشن جغرافياسى بو باغليليغا سبأپ بولوپ گليأر. يعنى توركمنيستانينگ اركين سوولارا و دونيأ بازارلارينا آچيلماغا يولى يوق. همه زاتدان بترى- ده، ساويت دؤورينده توركمنيستان اؤزباشينا داشارى دؤولتلرى بيلن قاتناشيپ بيلمه يأردى، مسکوسيز يلك باشى قيميلداماياردى، اركين حركت اتمك اوغروندا گؤره شــده يوقدى. باشينى قالديرانينگ باشى آلينياردى.

ايندى قاراشسيزليغينا قاوشان توركمنيستان هنيز بوگونه چنلى اورسيده باغليليق يوپلرى قوپاريپ بيلمأن گليأر. مونى اينگ يوقارى درجه لى دؤولت چينونيكلرى- ده ايسلأپ دورانوقلار، اؤورنشن ياغيميز دييپ، روسچيليق منتاليتــتدن حالاص بولوپ بيلمأنلرينگ سانى آز دأل. مثال اوچين توركمن ديلى، تاريخى و ملى مدنيتى اؤسدورملى، روس/كريل اليپ- بينى آيريپ اؤز بولوشلى لاتين حاطى قبول ادن نيازوف، داشارى حالقارا ماصلاحاتلارا-آ بئيله- ده دورسون حتى توركيه دير قونگشى توركى ديللى جمهوريتلره باراندا، يا- دا اولارينگ يولباشچيلارى بيلن دوشوشاندا روسچا گپلأپ باشلايار. اونسونگ اوندان گؤرلده آليپ بيله ايشلشيأنلرينگ حالى اؤز-اؤزيندن بللى. شونگا گؤرأ باريپ ايكى عاصيردان قاوراق وقت بأرى مركزى آسيادا يايراپ گليأن روس ديلى و مدنيتينى باسغيسيندان بيربادا آزاد بولماق آنگسات دأل يالى بولوپ گؤرونيأر. يؤنه مونگا قارامازدان بو دوغـرودا برك گؤرشينگ گره كليديگـى اورتا چيقيار.

حأضير دونيأنينگ اؤسن دؤولتلرينده همه ايشلرى حكومتلرى آليپ بارمان، حؤكومته دگيشلى بولماديق، سوسيال مسئله لرى بيلن مشغوللانيپ يؤرن سانسيز قورامالار آليپ باريار. يؤنه قينانساغام توركمنيستاندا جناب نيازوف بير باشينا روبين هود يا- دا گؤروغلى بولاسى گليپ، حأكميت- ينگ اوچ شاخاسينى- دا اؤز الينده ساقلاپ گليأر. بير گؤرسنگ پره زيدنت حؤكمينده يرينه يتيريجى ايشلرى آليپ باريار، بير گؤرسنگ حاربى گويچلرينگ باش كامانديوشچيسى، قشون گنرالى اشگينه گيريأر، بيرگون سود ايشينى آليپ باريار، بيرگون تاريخچى، ديلچى بوليار، شاهيرچيليقدانام باشى چيقيار،  آى قاراض شونينگ اليندن گلمه يأن ايش يوق. اونسونگ باشغا آدملارينگ ياردامى هم ماصلاحاتى گره ك بولوبام دورانوق، يؤنه نأمه دير بير كمچيليك بولاندا اول باشغالارينگ اوستونه قيغيريار بيز- أ بيلمه ديك!؟

 

توركمنيستانينگ داشارى ايشلر منيسترلرى:

ساويت سايوزى دؤورىنينگ سونگقى يئللاريندا، شوروىنينگ عاراپ اميراتلاريندا داشارى ايشلر منيسترى بولان عبدى قوليف، 90-1989 نجى يئلدا توركمنيستانينگ داشارى ايشلر منيسترى بوليار و بو وظيفأنى 1993- نجى مارت آيئنا چنلى سوردوريأر. شول يئل نيازوف اونى وظيفه سيندن بوشاديار. عبدى قوليف مسكو گليپ توركمنيستان فوندينى اساسلانديريار و آپـپـبازيسيا كرونينه باشتوتانليق اديأر. نيازوف، انه سى ارمنى بولان بوريس اورارويچ شيخ مرادوفى توركمنيستانينگ داشارى ايشلر منيسترى اديپ بلله يأر. اول- دا اؤز وظيفه سينى 2000- نجى يئلينگ اورتالارينا چنلى دوام اتديأر. سونگرا نيازوف اونى وظيفه سيندن بوشاديپ، هينديستانا ايلچى اديپ ايبريأر هم- ده اونى خزر مسئله سينده يؤريته ايلچيسى اديأر. بو گزك، شوتزاريادا ايلچى بولوپ ايشله يأن باتير برديف آشغابادا چاغيريليپ، يوردينگ داشارى ايشلر منيسترى اديپ بلله نيأر. نيازوف اونى- دا عرق حورليق و عيال بازليقدا عايپلاپ 6 بولوپ بولمانقا وظيفه سيندن بوشاديپ، يرينه رشيد مردوفـى بلله يأر.

توركمنيستان، يوروپانينگ گرمانيا، فرانسيا، بلگـيا، آنگليا، شوتزاريا يالى دؤولتلرينده، شئيله- ده بيرلشن اشتاتلاريندا اؤز ايلچىحانالارينى آچيار.  نيازوف، 1994- نجى يئلدا گليپ- چيقيشى توركيه لى بولان خليل اوغورى، توركمنيستانينگ بيرلشن اشتاتلارينداقى ايلچيسى اديپ بلله يأر.

    توركمنيستان داشارى سياساتيندا اساسانام اورسيت بيلن آليپ باريان سياسى، اقتصادى و سؤودا قاتناشيغيندا ساويت دؤوريندن اونچاقلى دويپلى پارخ- تاپاوتلى اوغوردان گيده نوق، يئنه اؤنگكى حمام اؤنگكى طاس. 

  ساويت سايوزى دارغاندان سونگ، بيزينگ سبتيميزده 20- نجى عاصرينگ باشيندا گويچلى دؤولتلرينگ آراسينداقى بأسدشليك حركتى قايتادان جانلاندى. اونگا Great game يا- دا اولى اويون دييليأردى. بيزينگ دؤوريميزينگ اولى اويونجيلارى، اورسيت، بيرلشن اشتاتلارى، ايران و توركيه، اويناليان ميدان/ آبيكت بولسا اورتا آسيا شول ساندان توركمنيستان و خزر بايليقلاريدير.

 

اورسيت- توركمنيستان قـاتـناشيغى:

ساويت سايوزى دارغاندان سونگ دؤرأن اوتوريته بوشليغينى دولدورماق اوچين اورسيت گيجيگمأن حركته گيريشدى و اؤزينه وفالى بيروكراتلاريندان پئيدالانيپ، اوزالقى باغليليق يوپى بركيتدى. حتى توركمنيستانينگ طبيعى گازينى آرزان ساتين آلماغى و اوستوندن گچيأن گاز توربالاريندان آليان تاريفلارينى آريتديرماغى باشاردى. پره زيدنت نيازوف هرنأچه اورسيته گاز ساتيلمايار دييسه- ده نأرسمى ماغلوماتلارا گؤرأ، اورسته گازينگ اكسپورتى هيچ ماحال كسيلمأندير. گازلارينى بيز آلماساق، توركمنلر چأگه ايمه لى بولار ديين اورسيدينگ گازپروم شركتىنينگ باشليغى ريم وياخروف، توركمنيستانا گلنده، پره زيدنت نيازوينگ اؤنگونده ديزا چؤكيپ، آيدان سؤزيندن اؤتونچ سورامالى بولدى.  اورسيت، خزر دنگزىنينگ آشاغيندان چكيليپ، توركمن گازىنينگ توركييأ آشيريلماغى و بيرلشن اشتاتلارينگ قولداو بريپ گليأن ترانس- خزر پرايكيتىنينگ عمله آشمان قالماغيندا بللى درجه ده رول اويناپ گليأر. خزر دنگزىنينگ استاتوسينى كسگيتلمكده اورسيت ايران بيلن بير منگزش پازيسيانى ايه لدى، آيرى طاراپدان پره زيدنت نيازوف، اديل آشغاباتدا ياسادان و گونده بير گزك اؤز داشينا آيلانيان هيكلى يالى 24 ساغادينگ دواميندا آيلاملى سياست آليپ باريار. بيرگورسنگ اورسيدينگ يانيندا، بيرگون بولسا ايرانينگ پازيسياسينى قولدايار، قازاغيستانا بارسا قازاغينگ طاراپيندا دوريار. آخر سونگـى اليندن هيچ زات گلمأن، توركمنيستان بىطاراپليق سياساتينى آليپ باريار دييپ، اوتوران يرينده اوتروبريأر.

اورسيدينگ حاربى گويچلرى قاراشسيرليقدان 8 يئل سونگرا 1998- نجى يئلا چنلى توركمنيستاندا ساقلانيپ، دينگه شوندان سونگ، توركمنيستاندان چيقيپ گيتديلر. 94- نجى يئلينگ 27- نجى يانواريندا مسکودا برن مطبوغات كانفرنسياسيندا اورسيت فدراتسياسىنينگ شول واقتقى داشارى ايشلر منيسترى آندرى كوزيروف، اورسيت قشونىنينگ اوزالقى ساويت جمهوريتلرينده ساقلانجاقديغينى مأليم اتدى (كيهان تهران 27 يانوار 94)

  اورسيدينگ اوزالقى پره زيدنتى بوريس يلتسين توركمنيستانا باراندا نيازوف اونگا بدو آطينگ يانى بيلن توركمنيستانينگ پاسپورتينى بريأر. شئيله ليك بيلن تروباشدان توركمنيستان روسلارا قوشا گراژدانليليق حقوقينى بريأر. يؤنه بو- دا بئيله كى قاتناشيقلاردا بوليشى يالى بير طاراپلايئندى، سبأبى مسکو توركمن راياتلارينا قوشا رایاتلیغی تانيمادى. دينگه مسکونينگ اؤزينده نأچه مونگ توركمنينگ ياشايانديغى چاق اديليأر. 95- نجى يئلينگ اييونيندا ماسكوا باران نيازوف، يلتسينه بير توركمن آطينى ساوغات بريپدير، اشيديشيميزه گؤرأ بو آط، مسكونينگ اته گينده بير طبله حانادا آچليقدان اؤليپدير.

 

ايران- توركمنيستان قـاتـناشيغى:

ساويت توركمنيستانينگ پره زيدنتى حؤكمينده ساپارميرات نيازوف  91- نجى يئلينگ 9- نجى اوكتيابرينده 65 آدمداملاری باشتوتانليق اديپ 3 گونليك رسمى ساپار بيلن ايرانا باريپ، اؤز ايرانلى كأردشى هاشمى رفسنجانى بيلن دوشوشيپدير. شوندا نيازوف، ساويت سايوزىنينگ كامونيستيك پارتياسىنينگ بيرينجى سكره تارى ميخايئل گارباچوف- ينگ يؤريته حاطينى رفسنجانا قاوشيريار. شوندا نيازوف 26- نجى اوكتابرده رفرندوم گچيريليپ، توركمن حالقىنينگ قاراشسيزليغا سس برجكديگينى مأليم اديپدير. قاراشسيزليقدان سونگرا بيز دنگ حقوقلى ساويت سايوزيندا قالاريس دييپ من ميخايئل گارباچوفى اينانديرديم دييپ توركمنيستانينگ پره زيدنتى تهراندا مأليم اديپدير(كيهان تهران 9 اكتبر 91 شماره 14303)  ايران، توركمنيستانينگ قاراشسيزليغينى ايكى آى سونگرا ياغنى دكابرينگ 25- ينه رسمى تايدان اقرار اديپدير(كيهان تهران نشرى شماره 14369/ 25 دسامبر سانى). ايرانينگ داشارى ايشلر مينيسترىنينگ آسيا و اروپا بؤلومى بويونچا مينيسرينگ ارونباسارى محمود واعظىنينگ 91- نجى يئلينگ 28- نجى دكابردا آشغابادا ساپارى واقتيندا، ايران ايلكينجى گزه ك اؤز ايلچىحاناسينى آچيپدير.

1991- نجى يئلينگ 6- نجى دكابريندا ايرانينگ شول واقتقى داشارى ايشلر مينيسترى ولايتى آشغابادا باريپدير.

توركمنيستان بيلن ايران آراسيندا اينچه برونينگ پل ديين يريندن گچلگه نوقادى آچيلدى.(17- نجى يانوار 1992- نجى يئل)

1992- نجى يئلينگ 5- نجى مارتيندا لندنده چاپ بوليان كيهان نشرى، ساندى تايمز نشرينگ ژورناليستى حسين كوكان- ينگ آشغاباتدان برن ماغلوماتينى نشر اديپدير. ماقالا توركمنيستانينگ باش روحانيسى حضرتقـلى حانف- ينگ سؤزلرينه سالغيلانان: ايران اسلام جمهوريتى بيزينگ دوغانيميز دأل، اول بيزينگ اؤسوشيميزه بؤوت بوليار ديين سؤزباشى بيلن يرلشديريليپدير. ماقالانينگ دواميندا توركمنيستانينگ رسميلرى شول ساندان داشارى ايشلر مينيسترى عبدى قوليف- ينگ 70 يئللاپ كامونيزيم ايدئولوگياسيندان سونگرا اسلام ايدئولوگياسىنينگ قبول اديپ بولماجاقديغينى بللأپديرلر. ماقالادا شونينگ يانى- دا اسلامچى فوندمنتاليسيم دوشونجأنينگ اورتا آسيا يايراماغينا آلادا بيلديريليپدير.

92- نجى يئلينگ 29- نجى مارت سانيندا پره زيدنت نيازوينگ سؤزلرينه سالغيلانيپ، بيز ايرانى اؤزوميزينگ هميشه ليك دوغانيميز حاساب اديأريس اولى سؤزلر بيلن ايران نشرلارى چاپدان چيقيپدير. شول يئلينگ 5- نجى مايئندا ايران اؤزىنينگ مدنيت اؤيونى آشغاباتدا آچيپدير. سونگرا اسلامى كتابلارى نشر اديأن الهدى آدلى كتاب ماغازينى آچيليپدير.  شول يئلينگ 9- نجى مايئندا ايران پره زيدنتى رفسنجانى آشغابادا باريپدير. 8- نجى ايولدا آشغابات- ماشات آراسيندا يولاغچى قاتناديان آوتوبوس ايشه باشلاپدير و 22- نجى ايولدا ايلكنجى گزه ك تهران-آشغابات آراسيندا يولاغچى اوچارى قاتناپ باشلاپدير.

توركمنيستان، ايران اسلام جمهوريتينه ايلكينجى ايلچيسى اديپ 25- نجى ايولدا آتا چاريف ايبريپدير.

فرانس پرس حابار آگنتليگـى 93- نجى يئلينگ 5- نجى مارتيندا مسكودان برن ماغلوماتينا لايئليقدا، توركمنيستان عليملار اكادمياسىنينگ آكادميگـى آقاجان بابايف ايزوستيا نشرنه برن اينترويوسندا، اورسيدينگ، ايرانا ساليپ برجك يادرو رئاكتورينه قارشيديقلارينى مأليم اديپدير. عاليمنگ فكريچه بو مركز قورلان ياغدايئندا، خزر دنگزىنينگ سووىنينگ آرتماغينا و كؤپ سانلى ير ايرانمالارا آليپ گلجكميش.  توركمنلر ايراندا سالينجاق يادرو مركزينه قارشى دييپ اولىحارپلار بيلن لندنده چاپ بوليان كيهان نشرى اؤزىنينگ 18- نجى مارت سانيندا بللأپدير.

توركمنيستان، ايرانا ياقينلاشديقچا، اسلامى ايدئولوگيادان پايئنى آليار. ايران مطبوغاتى، توركمنيستاندا پارس ديلى، قرآن اؤورديأن كورسلارى و ايرانينگ دينى مكانلارينا موغتينا قويان توريستيك ساپارلارينا توركمنينگ تاپيليانديغيندان دونونينا سيغماياردى. آيرى طاراپدان، توركمنيستان بيلن آراچأكده ياشايان ايرانلىلارينگ آشغابادينگ تله ويدنياسينى توماشا اتمأگه نأگيله ليك بيلديريأردى. بو بارادا هرگون ديين يالى ايران نشرلاريندا ماغلومات چاپ بولياردى.

اما ايران بيلن توركمنيستانينگ دپلوماتيك قاتناشيغيندا، توركمنينگ دوردپل Dordepel آطىنينگ ايران پره زيدنتى رفسنجانينى اؤز آرقاسيندان يره زينگماغى اؤريليش نوقاط دييئن يالى حاسابلاندى. ايرانينگ شول واقتقى پره زيدنتى علىاكبر هاشمى رفسنجانى توركمنيستانينگ قاراشسيزليغىنينگ 2- نجى يئل دؤنومى مناسيبتلى 93- نجى يئلينگ 27- نجى اكتيابرينده آشغابادا باراندا، نيازوف اونگا مشهور توركمن آطينى ساوغات بريپدير. آطا مونمگـى هؤوس ادن رفسنجانى، دوردپه لينگ اؤزنگه سينه باسار- باسماز، جانوار بىاينجاليق بولوپ باشلاپدير، هؤرا- كوشه بيلن ساقلانيپ بيلمه ديك آط گؤيه آرقاسينداقىنينگ كيمديگينى آنگيپ، رفسنجانينى گوپلأن يره چاليپدير، اونونگ سله سى بير يرده دونى بير يرده ياتير دييأر، يؤنه شول پورصاتدا آلنان صورات، هم ايران هم- ده توركمنيستان نشرلارينا چاپ اتمك قاداغان اديليپدير. شول گونلر من- ده توركمنيستانا باريپديم. گنگ قالان بير زاديمى آيديپ بره يين. رفسنجانينى، مارىنينگ تؤوره گينده اؤز آدى داقيلان بير اوبا باراندا بير بلوچ اومزيپ، ايران پره زيدنتىنينگ يانينا باريپ، من 70 يئلاپ توركمنيستاندا ياشايارين، يؤنه اؤزومى بو گون ايرانلى دويدوم دييدى.

 

 ايران- توركمنيستان قاتناشيغىنينگ دوامى

1994- نجى يئلينگ 3- نجى يانواريندا نيازوف ايرانا باردى. اول اوزالى بيلن اسلام جمهوريتينگ دويبونى توتان آيت الله خمينىنينگ مازارينى زيارت اديپدير. گنگ طاراپى، ايرانينگ رسميلرى توركييأ باراندا آتاتوركونگ مزارينا بارمايالار، شونگا گؤرأ تورك رسميلرى- ده خمينىنينگ مازارينا بارانوقلار. نيازوينگ شول ساپاريندا تهراندا آق آويلى آدينداقى كؤچه، توركمنيستان آدينا اويتگه ديليپدير و نيازوف، تهرانينگ حورماتلى گراژدانليغينا قبول اديليپدير.

آتا چاريفدان سونگرا توركمنيستانينگ تهرانا ايلچى اديپ ايبرنى آمانگلدى بايرامف، ايران مطبوغاتينا برن اينترويوسيندا، آشغابادينگ، ايرانينگ صناغات بويونچا تكنولوگياسينا مأتأچديگينى آيديپدير. توركمنيستان، استيودنتلرينگ يانى بيلن توركمنصحرانينگ دينى مدرسه لرينده تعليم آلماغا توركمنيستانلى طاليبلارينگ گلمه گينه- ده روغصات بريأر. آشغاباتدا قرانى اونگات اوقاماق بويونچا ياريشينگ گچيريلنديگينى ايران نشرلارى بويسانچ بيلن حابار بريأر.

1994- نجى يئلينگ 16- نجى آپريلينده ايندى توركمنباشى دييليأن نيازوف، توركمن پارلامنتينده ادن چيقيشيندا: گونباتار دؤولتلرى بيزه قيسيش گورگزيأر، يؤنه ايران آق يوره گـى بيلن بيزه كمك اديأر ديپدير. ايرانينگ مطبوغاتيندا كأمأحال نيازوف- ينگ آدينى پارسچالاشديران گؤرنيشده ياغنى نياززاده دييپ چاپ اتديلر.

94- نجى يئلينگ اوكتيابريندا، آشغاباتدا ايرانينگ مدنيت گونلرى آچيليار. شوندا آزادى آدينداقى دييلر اينيستيتوتيندا پارس ديلى كورسىنينگ يولا قويولانديغى مأليم اديليپدير. يؤنه گنگ طاراپى شو گچن 12 يئلينگ دواميندا شئيله آيديليپ- دييلمگينه قارامازدان، توركمنيستان طاراپى، توركمنلرينگ اوتوريان يرينده حتى نشرينى ساتووا حؤدورلمأگه كيوسك آلماغى- دا باشارمان گليأر.

  ايران تله ويدنياسى، 1997- نجى يئلدا اسلام اولكه لرى آدلى تله گپله شيگينده، توركمنيستانينگ توپراغينى قديمى ايران يوردى ديدى و ايندى اونونگ حاقيقى ايه لرينه يعنى اؤزلرينه قايديپ گلملى ديئن فكرى اؤنگه سوردى. بو فكرى ايرانلى يازيجى و كأبير سياساتچيلارى ماحال- ماحال آرا آتيارلار. يؤنه توركمن طاراپى بولارا جوغاب برمأن گليأر. ترسينه، توركمنيستاندا، پارسلارينگ آيديشى يالى مارى، مرو، استيودنت، طاليب، حاكم، اطراب و شونگا منگزش ترمنيلرى توركمن سؤزينه گيريزيلدى.

توركمنيستانينگ پره زيدنتى اؤز طبيعى گازينى ايرانا اكسپورت اتمك مسئله سينى ماصلاحاتلاشماق اوچين، 94- نجى يئلينگ 23- نجى اگوستيندا تهرانا باريار. شوندا توركمن الكتريك انرگياسىنينگ ايرانا ساتيلماغى و ماشات- ساراغيت- تجن دمير يولىنينگ يولا قويولماغى باراسيندا فكر آلشيليار. توركمنيستانينگ شول واقتقى الكتريك انرگيا منيسترى صفرمراد نوريف،  توركمنصحرانينگ آق قالا شهرينه باريار. 1996- نجى يئلينگ 16- نجى ايوليندا، نيازوينگ 14 گزه ك ايرانا بارانديغينى دورلى نشرلار يازديلار. 97- نجى يئلينگ آگوست آيئندا ادن چيقيشيندا، گلجك يئلدان باشلاپ، توركمنيستانينگ يئلدا 9 ميليارد كوبامتر گازينى ايرانا اكسپورت اتجكديگينى نيازوف آيديپدير.

98- نجى يئلدان بو يانا توركمنيستان- آيران قاتناشيغيندا، آونيق-اوشاق سؤودا ايشلرىنينگ يانى بيلن خزر دنگزىنينگ استاتوسينى كسگيتلمك اساسى اورن آليپدير. ماشات- ساراغيت- تجن دميريولىنينگ دابارلى آچيليشى، توركمنيستان مجليسىنينگ باشتوتانى صحت مرادوف- ينگ ايرانا ساپاريندان باشغا اونچاقلى اؤسوش گؤرونمأندير. يؤنه مونگا قارامازدان ايرانينگ آشغابادا ايبرن تأزه ايلچيسى سيدابراهيم درازگيسو، پارس مدنيتىنينگ توركمنيستاندا يايراماغى اوچين هرحيل چأره لرى گؤريأر. اول حتى اؤزينه مدنيت ايشلرى بويونچا گنگشچى اديپ، ايكى سانى ايرانلى توركمنى- ده ايشه آليپدير. حاچاندا توركمنيستانلى باغشيلار توپارى  يا- دا تئاترچيلارى ايرانا باراندا، اولارا توركمنلرينگ آراسيندا چيقيش اتمأگه اؤرأن سه يرك روغصات اديليأر، ايرانليلار بولسا، توركمنيستاندا مدنى حركتلرينى اركين آليپ باريارلار. توركمنيستانينگ، توركمنصحرادا ايلچى حاناسى بولمان، اول پارس اوتروملى شأهرلرده آچيليپدير. 

 

توركيه- توركمنيستان قاتناشيغى:

اولى اويونينگ بير اويونجيسى بولان توركيه، توركمنيستان قاراشسيزليغينى جار ادن بادينا اونى رسمى تايدان اقرار اتدى. آنكارا قاراشسيزليغينا قاوشان اورتا آسياداقى توركى جمهوريتلرى بيلن قاتناشيقلارينى حاص اؤسدورجكديگينى آيديپ، بو دوغوردا آكتيو حركت اديپ، شول باشدا، بو دؤولتلرده اؤز ايلچىحانالارينى آچيپ اوغرادى. توركييأنينگ بو حركتلرى، ايراندير، اورسئيده ياقماياردى. بئيله حركتلر، پان توركيزيم ديليپ حأصيتلنديريليأردى. مثال اوچين تهراندا چاپ بوليان كيهان نشرى اؤزىنينگ 1991- نجى يئلينگ 13- نجى اوكتيابر سانيندا، حسين ضيايى ديين بيريسىنينگ سياسى آناليتيك ماقالاسينى چاپ اديپدير. اوندا شئيله دييليپدير: توركلر اوزالقى تورك ايمپريانينگ ديكلديلمگـى اوغروندا آلادا اديأرلر، اولار ديل، تاريخ و مدنى منگزشليكلرى اساسيندا بو جمهوريتلرده گون سايئن اؤز تأثيرلرينى آرتديريارلار. اولارينگ يانى بيلن بيرلشن اشتاتلارى و اسرايئل- ده رگيونه گليپ باشلارلار، بو بولسا ايران اسلام جمهوريتىنينگ پئيداسينا بولماز دييپ ايرانلى يازيجى بللأپدير.

توركيه جمهوريتىنينگ قورلشىنينگ 68- نجى يئل دؤنومى، اورتا آسيا و آذربايجانينگ ليدرلرىنينگ قاتناشماغيندا آنكارادا اولى دابارا بيلن قوتلاندى. سونگرا شول يئلينگ 2- نجى دكابرينده توركمنيستانينگ پره زيدنتى، توركييأنينگ پره زيدنتى تورگوت اوزال- ينگ رسمى چاغيريشى بيلن آنكارا باردى. توركمن پره زيدنتى اؤز يانى بيلن 3 ياشار ملكه آديندا بير آطى آليپ باريپ، اونى اوزالا ساوغات بردى. نيازوف، توركيأنينگ ازميز شأهرىنينگ حأكيمى توتلو التاش بيلن دوشوشاندا: اگرده توركيه دأكى توركمنلر مئيله تين توركمنيستانا گؤچيپ بارجاق ايسله سه لر، بيز اولارى قبول ادريس دييپدير.

   توركييأنينگ ميلليت نشرى اؤزونينگ 2- نجى مارت سانيندا توركيه- توركمنيستان قاتناشيغى باراسيندا شئيله ماغلومات بريپدير: داشارى ايشلر منيستريميز حكمت چتين و يانينداقى توپار، قاراشسيزليغينا قاوشان توركى جمهوريتلرينه ساپارىنينگ دواميندا توركمنيستانا باردى. توپار، توركمنيستاندا ديل و ماغاريف پوداغيندا حيذماتداشليق اتمك باراسينداقى پروتكولا قول قويدى. توركييأنينگ ماغاريف منيسترى كؤكسال توپتان، داشارى ايشلر مينيسترى چتين و توركمنيستانينگ پره زيدنتى نيازوف- ينگ قاتناشماغيندا گچيريلن مطبوغات كانفرنسيادا، چتين، توركييأنينگ توركمنيستانا برجك يارداملارىنينگ قارشيليغينا مأتأچ دألديكلرينى و بو ايشده آنكارانينگ جوغابكأرچيليك دوييانديغينى آيديپدير. توركمنيستانينگ شول واقـتـقى مــاغاريف منيسترى نورى بايرام صحت اوف، توركمنيستانينگ قولايدا لاتين اليب- بيسينه گچيلجكديگينى مأليم اتدى- دييپ ميلليت نشرتى يازيپدير.

توركييأنينگ توركمنيستانداقى ايلكينجى ايلچيسى سلجوق اينجه سوو، اؤز دؤولتىنينگ آشغابادا لاتين اليب- بيى اساسلى بير چاپحانا ساوغات برنديگينى بيلديريپدير.

1992- نجى يئلينگ مارت آيىنينگ 3- نده توركييأنينگ پريمر منيسترى سليمان دميرل، مركزى آسيا دؤولتلره ساپارىنينگ چيغريندا توركمنيستانا باريار و توركمن گازىنينگ توركييأنينگ اوستى بيلن گونباتارا اكسپورتى دوغروسيندا نيازوف بيلن ماصلاحات اديأر، اديل شول گونلر ايرانينگ پره زيدنتى رفسنجانى- دا آشغابادا باريار.

توركيه- توركمنيستان قاتناشيغينى اؤسدورمك اوغروندا 92- نجى يئلينگ ماى آيئندا استانبولدا توركيه- توركمنيستان حيذماتداشليق و ايش بيرليك آديندا بير جمعيت اساسلانيار. شول يئلينگ سنتابريندا 12 مونگ سانى توركمنيستانلى اوغلانلار، يوقارى اوقوو آلماق اوچين توركييأ ايبريليپدير. توركمنيستانينگ تله ويدنياسى، بو باردا شئيله ماغلومات بريپدير: قولايدا توركمنيستانينگ ماغاريف منيسترى آنكارا ادن ساپاريندا، توركمنلرينگ توركيه ده يوقارى اوقوو آلماقلارى اوچين بير ايلالاشيغا قول قويولدى، شوندا استيودنتلر 3 يئل مهلتى بيلن توركييأ ايبريليأر ديدى.

94- نجى يئلدا توركمنيستانينگ قاراشسيزليق بايرامچيليغينادا ايرانينگ، توركييأنينگ، پأكيستانينگ و آذربگجانينگ ليدرلرى آشغابادا گليپ، اقتصادى و سياسى قاتناشيقلارينگ اؤسدوريلمگـى اوغرونداقى بأسدشيكلى اويونلارينى دوام اتديريأرلر.

توركيأنينگ شول واقتقى پريمر منيسترى خانم تانسو چيللر مركزى آسيا دؤولتلرىنينگ ساپاريندا 95- نجى يئلينگ 20- نجى آگوستيندا آشغابادا باريار. اونونگ مونيپ باران اوچارى تكنيكى سبأپدن اؤترى اوچوشا دوان اديب بيلمأنسونگ، توركمنباشى اؤز حصوصى اوچارينى تانسو چيللر و اونونگ يانينداقى توپارا اختياريندا قوييار. توركييأنينگ حرّيت نشرى 21- نجى آگوست سانيندا چيللرده اوچان ساراى ايسله دى سؤزباشلى ماغلوماتيندا توركمنباشىنينگ بوئينگ 757 تيپلى اوچارى باراسيندا شئيله يازيپدير: 200- دن قاوراق آدمى داشاپ بيليأن بو اوچارينگ گينگ زالى، بانيوسى، قيسغا سؤز بيلن آيستاق اوچان كؤشك دير

توركى ديللى دؤولتلرينگ ماصلاحاتى هريئلدا بير دؤلتده گچيريليپ، مدنيت و ديل اوغرونداقى ياقينلاشما و اورتاق حيذماتداشليق دوغروسيندا ماصلاحات اديليأر. توركى ديللى دؤولتلرينگ ايلكينجى ماصلاحاتى 1992- نجى يئلدا آنكاردا، 94- نجى يئلدا استانبولدا، 95- نجى يئلينگ آگوستيندا  ماصلاحاتينگ 3- نجيسى بيشككده، 96- نجى يئلدا داشكنتده گچيريلدى و اول سونگقى گزك 2001- نجى يئلينگ آپريليندا استانبولدا گچيريلدى، شوندا اورتا آسيا دؤولت باشتوتانلار شول ساندان نيازوف روس ديلينده چيقيش اتديلر. دينگه آذربگجانينگ ليدرى حيدر عليف اؤز انه ديلينده گپله دى.

1995- نجى يئلدا دؤولته و يا- دا هيچ بير سياسى توپارا دگيشلى بولماديق، توركيه- توركمنيستان دوستلوق جمعيتى طاراپيندان بيرلشن توركمنيستان آدلى بروشوراجيق نشر بوليار. اوندا توركمن توپراغىنينگ اورسيت بيلن ايران آراسيندا بؤلننديگـى و آراچأگينگ ايكى يانيندا ياشايان توركمنلرينگ بيرديگـى نيغتاليپدير. ايران نشرلارى مونى آليپ گؤتريپ: توركيه، ايرانداقى ساپراتيستيك توپارالارا حمايت بريأر دييپ يازديلار. 3 مونگ يئل موندان اوزال حأضيركى توركمنيستان توپراغىنينگ ايرانينگقىديغينى بو ايرانلى نشر اؤنگه سوريپدير( كيهان هوايى 13 دسامبر 95/ شماره 1160)

توركيه، قاراشسيزليغينگ باشلانغيچ يئللاريندا توركمنيستانا اولى مؤچبرده كرديت ممكينچيليگينى دؤره تدى. شول اساسدا توركييأنينگ ايشه ؤر توپارلارى توركمنيستانا دويپلى مايا ياتيرماغا، تأزه فابريك- زاودلارى قوراماغا گيريشدى. ديل، مدنيت و اورتاق تاريخدان اؤترى، شخصى بأهبيدىنينگ ايزيندا سرمنشيپ يؤرن توركيه لى سووديگأرلرى، نيازوف- ينگ يومشاق دامارينى تاپيپ، اؤوگينى آشا حالايان پره زيدنت- ينگ يانينا بارها ياقينلاشيارديلار. توركيه لى بيزنسمنلرى، نيازوف- ينگ يوز كشبينى آلتيندان قويدوريپ، اونگا سوغات برديلر، يئنه- ده هر حيل سرپايلار ياپيپ، توركمنيستاندا اركين قازاغا آيلانديلار. اوزال اؤزلرينى تورك دييأن توركيه لى سؤوديگأرلر، سونگاباقا اؤزلرينى تكه هم تيره سيندن دييديلر. البته ايرانليلار يا- دا روسلار بيلن دنگشديريلنده، توركلر انچمه دويپلى كارخانالارى قوردولار. اولارينگ سانى آغزاردان كؤپ. يؤنه سؤديگأر، سؤوديگأر بوليار. اولار اوچين شخصى بأهبيت بيرينجى اوروندا دوريار. قاليبرسه ايشچى دييپ اؤزلرى بيلن توكيه دن توركمنيستانا گتيرن آدملارينگ آراسيندا تويسى بوزوقلار- دا تاپيلياردى. حالقينگ مادى دورموشىنينگ پسليگـى ضرارلى، كأ حالاتلاردا ناميسه دگمك يالى اربت گوررينگلر- ده يايراپ اوغرادى. البته هيچ كيمى زورلاپ بير ايشه مجبور اديپ بولماز، يؤنه پره زيدنت نيازوف- ينگ رژيمينده حالق گداى گونه دوشن سونگ يورتدا جلبچيليك يالى پيس ايشلر يونگ بولماسا گنگ. توركلر، توركمنلرينگ ناميسينا دگيأر ديين گوررينگينگ آشا چيشيريلمگينده، آنتى تورك تؤوه ركلرينگ- ده رولى آز بولان دألدير دييپ دوشونيأرين. 60 ميليونليق توركيه ده دوغوردانان 72 ملت بار، بير دوستومينگ آيتماغينا گؤرأ، توركيه دينگه توركلردن باشغاسى دؤوران سوريپ، اينگ حورلانيانى تورك حالقى. توركمنيستانا ايشچى ديليپ گتيريلنلرينگ آراسيندا تورك اولوسينا دوشمانچيليقلى قارايانلارينگ بولماغى آخمال شونگا گؤرأ بو ايشىنينگ اؤنگونى آلماق اوچين بيرينجى نوباتدا توركمن ليدرى، داشاردان گتيريلجك آدملارينگ سانينى چأكلنديريپ، كؤپلنچ توركمنلره ايش تاپيلماغا ممكينچيليك دؤرتملى، ايكينجيدن گتيريليأن آدملار، ياغشى كنترول اديلملى، توركمنيستاندا نأمه بول، يؤريته قوللوقدا ايشله يأنلر بول. سؤزينگ قيسغاسى اؤسوپ باريان كاپيتاليسم جمعتينده بولار يالى قاتناشيقلار دونيأنينگ كؤپ دؤولتلرينده عاداتى ياغداى. توركمن، ماشغالا ناميسنى هر زاتدان يوقاردا توتيانى اوچين پيس ايشلرينگ جمعيتده بولمازليغينى ايسله يأر و شول يوزدن اونگا بىاينجاليق بوليار.

ترانس- خزر پرايكيتىنينگ توغتانديغينا قارامازدان، توركيه- توركمنيستان قاتناشيغى اؤسيأر و مونى ايسلمه يأن تؤوره كلر دورلى پريملر بيلن باداق آتيپ، قاتناشيقلارا بؤوت دؤرتجك بوليارلار. بيزينگ فكريميزچه اگر- ده سياسى، اقتصادى و مدنى قاتناشيقلاردا نأسازليقلار بار بولسا، اونونگ تقصيرى بيرينجى نوباتدا بيزينگ بوينوميزدا، سبأبى، اگرى اوتروپ دوغرى گپلشملى ديين پأهيم بار.

 

توركمنيستان- آوغانيستان قاتناشيغى:

شوروىنينگ قيزيل قشونى آوغانيستانا هجوم ادنده، اورتا آسيا شول ساندان توركمنيستاندان يوزلرچه عسگر قوربان بولدى، انچمه سى ماييپ- موجريپ قالدى. حالقينگ آراسيندا آفگانسكى ديين ترمين دؤره دى، يغنى آوغانيستانداقى اورشا قاتناشانلارا بئيله آد بريلدى. 92- نجى يئلدا نجيب الله نينگ رژيمى آغداريليپ يرينه مسلمان مجاهدلار گچنده، 1978- نجى يئلدان بأرى دوام اديپ گليأن اورشينگ سونگونا چيقيلار ديليپ آرزو اديلدى، يؤنه اول حام خيال بولدى. بو گزك مجاهدلار اؤز-آرا اورشا باشلاديلار. سونگوندا دعوانى قازانان آشا ديندارلار ديليپ تانليان طاليب توپارى بولدى. آوغانيستان يئنه- ده قانلى اورشونگ گردابينه غرق بولدى. يورتدا پاراحاتچيليغى اورناشديرماق اوغرونداقى تقلالارينگ حاطارينا نيازوف- دا قاتناشدى. اول بيرنأچه گزك مجاهد ليدرلرى اؤز يانينا چاغريپ، اولارى ياراشديرماغا سينانشدى، يؤريته ايلچيسينى اولارينگ اوستونه ايبردى، آشغاباتدا حالقارا درجه سينده ماصلاحات گچيردى. يؤنه آوغانيستانينگ قانلى ياراسينى بجرمك آنگساتليق بيلن باشاردانوق، آيرى ياندان نيت- ينگ بيلن قيلميشينگ بير بولماسا كيم سؤزينگه اينانار. پره زيدنت نيازوف بير طاراپدان اؤز دؤولتينى بىطاراپ دييپ جار اتديريأر، آيرى ياندان طاليب رژيمى بيلن سياسى و اقتصادى قاتناشيقلارى يولار قويوپ گلدی. شونگا گؤرأ نيازوف- ينگ آوغانيستان بويونچا ديپلوماسياسى شاوسيز بولوپ چيقدى.

 آوغانيستانلى توركمنلر

دونيأنينگ چار كوْنجوْنده ياشايان توركمنلر آتا واطانلى بولدى. اؤزباشداق، قاراشسيز، بىطاراپ دؤولتلى بولانيميزدان سونگ، بيز توركمنلر آتا واطانا قوللوق اتمه ليديريس. واطان سيزدن هيچ زادا مأتاچ دأل. يؤنه سيز آتا واطانى سؤيملىسينگيز، چاغالارينگيزدا- دا، نسيللرينگيز- ده توركمن واطانينا سؤيگـى دؤرتملىسينگيز. ايسلأنينگيز توركمنيستانا گؤچيپ گلينگ. الينگيزده توركمن پاسپورتى بولوپ، آرقانگيزدا آتا واطانميزينگ، قاراشسيز دؤولتينگيزينگ، توركمن حالقينگيزينگ بارديغينى هميشه دويوپ گزسنگيز، شول بيزينگ باغتيميزدير.  

  بو سؤزلرى جناب نيازوف 1996- نجى يئلينگ 25- نجى اوكتيابريندا "دونيأ توركمنلرىنينگ گومانيتار بيرلشيگـىنينگ 4- نجى كانفرنسياسىنينگ آچيليش مجليسينده آيديپدى.

   نيازوف، اوغانيستانلى توركمنلر باراسيندا- دا أسگرمزچيليك سياستينى آليپ گليأر. اوزالى بيلن تأجيگيستاندا ياشايان توركمنلر توركمنيستانا چاغيريلدى، يؤنه اولارا دورموشلارينى سازلاشديرماق اوچين مادى ممكينچيليك بريلمأنسونگ، اوستوسينه كأبير يرلى حالقدان ايگنچ سؤزى اشدنلريندن سونگ، يؤنه اوزالقى مكانلارينا گؤچيپ گيتديلر. آوغانيستانينگ دميرقازغيندا ياشيان توركمنلرينگ اومماسيز بؤلگـى ساويت دؤورينده، اساسان قالحوز قورلشى يئللاريندا دميزقازيق آوغانيستانا گؤچيپ گيتديلر.

اولار آتا مكانلارينا دولانيپ گلجك دييپ يوزلنسه- ده ائمغير چؤلده قيغيرانينگ سسينه منگزأن يالى، سسلرينى دينگلأن بولمادى. اورشينگ دوام اتمگـى نتيجه سينده جانلارينى قوتارماق ايسلأپ توركمنيستانا سيغنجاقلارا- دا يول بريلمأن اولار طاليبب رژيمينه قايتاريلدى. شول آراليقدا آوغانيستانينگ بللى روحانيلاريندان مرحوم قيزيل آياق خليفه نينگ آغتيغى عبدالمنان ماخصيم توركمنيستانينگ اوستى بيلن واطانداشليغا قبول اديلن توركييأ گيتمكچى بولوپ، آراچأگه گلنده توركمن حأكميتى اولارى طاليب رژيمينه قايتاريپ بردى و اول بيچأره بيرنأچه يولداشى بيلن 98- نجى يئلينگ اوكتيابرينده ايت اؤلدوريلن يالى اوريليپ اؤلدوريلدى.

ايرانا سيغنان آوغانيستانلى توركمنلر، ايران- توركمنيستان آراسيندا باغلانان شرط نامه اساسيندا توركمنيستانا گلمأگه ممكينچيليك تاپديلار. اولارينگ بير نأچه سى توركمنيستاندا يرلشديلر، حتى توركمنيستانلى قيزلار بيلن دورموش قوردولار. يؤنه توركمن حكومتى اولارى يورتدان قاودى. بو باردا بيزينگ راديوميزا قاوشان بير حاطدا شئيله دييليأر:

" 1978- نجى يئلداقى  سؤوشلرينگ نتيجه سينده مونگلرچه توركمن اؤى-اؤزارلارينى ترك اديپ، يول حاراجاتى اوچين الده بارينى ساتيپ- ساويپ ايرانا سيغينديلار. اولار بو يورتدا انچمه قينچيليقلارا دوچار بولاندان سونگ، توركمنيستان دؤولتىنينگ اولارا ايه ليك اتدجك حابارينى اشديپ، گؤزلريندن شاديانليق ياش آقديرديلار. توركمنلر يئنه بير گزك أهلى يئغنان زاتلارينى ساتيپ، توركمنيستانا گيدمك اوچين گون ساناپ باشلاديلار. آخر سونگـى قاراشيلان گون گليپ يتدى. 1996- نجى يئلينگ اوكتيابر آيئندا يوْركلرى اميددان دولى بوسغونلار مارى شأهرينه باريپ يتديلر. اما اولارينگ اوميد هم شادليغى تيز واغتينگ ايچينده حاسراتا قوصصا اؤوريلدى. بوسغونلارينگ ماريدا يرلشمگيندن 3 آى گچيپ-گچمأنكا توركمنيستانينگ يوقارى درجه لى دؤولت ايشگأرلرى رحمسيزليك بيلن اولارينگ 10 حوجاليغينى، جمعى 46 آدامى آوغانيستانا قايتاريپ برجكديگينى آيتديار. توركمنيستانينگ بو الهنچ قارارينىنينگ اؤنگونى آلماق اوچين ياشولىلار آشغابادا گيديپ دوْرلى دؤولت اورگانلارى شول ساندان داشارى ايشلر مينسترينگ يانينا باريپ، توركمنيستاندا قالماقلارينى سورايارلار. بو اورگانلار اوستى بيلن آلادالارىنينگ بير يره بارماجاغينا گؤز يتيرن ياشولىلار، توركمنيستانداقى بيرلشن ميللتلر قوراماسىنينگ بوسغونلار بويونچا يوقارى كاميسسارليغينا يوز توتماغا مجبور بوليارلار. اولارا اؤز عارضالارينى يازيپ برمگينى بو ادارا ايسله يأر. مونى دويان توركمنيستان دؤولتىنينگ مارى شأهر حأكيم- ينگ بويروغى بيلن سيغنان توركمنلره مهلت برمزدن 1997- نجى يئلينگ 12- نجى يانواريندا اولارينگ باريسينى اوتلا يوْكلأپ قيشينگ اينگ ساويق هواسيندا موبأرك رمضان آيى و ايلاتينگ آغزلارىنينگ بكديگينه قارامازدان آراچأگه آليپ گيديأرلر و بو يرده چاغالارينگ، عاياللارينگ ياشولى- ياش كيچيلرينگ آه- فريادلارينا قارامازدان باريسى آوغان رسميلرينه بريليأر.

   آوغانيستانا قايتاريلانلارينگ آراسيندا كسلحانادا ياتان و الينده 3 آيليق چاغاسى بولان بير زنان ماشغالا- دا بولوپدير. توركمن رسميلرى اونونگ حاسسا حالينا قارامازدان زور بيلن كسلحانادان چيقاريپ، اودلا موندوريأرلر. شئيله- ده توركمنيستانلى ييگيتلر بيلن نيكالاشيپ دورموش قوران ايكى سانى قيزينگ ياغدايئنا سر ادمزدن اولارى هم آوغانيستانا قايتاريارلار.

بيزينگ راديميزينگ پأكيستانداقى حابارچيسى شاهمردانقلى مرادىنينگ گونده ديين يالى بريپ دوران ماغلوماتيندا، پأكيستانينگ بوسغونلار لاگرينده ياشايان توركمنلرينگ همه سىنينگ توركمنيستانا گؤچيپ گيتمگينى آرزو اديأنديكلرينى مأليم اديأر. قازاق و قيرقيز دؤولتلرى اؤز ايلدشلرينى يئغناپ آليپ گيديپديرلر، يؤنه توركمنيستان دؤولتى توركمنلرينگ فريادلارينى اشيتمزدن گليأر.  نيازوف اؤزينى دونيأ توركمنلرينگ عمرليك پره زيدنتى، انسانپرور قورامانينگ پره زيدنتى دييپ جار اتديريأر. قازاق دؤلتى حتى ايراندا پاراحاتچيليقدا ياشايان قازاقلارى اؤز دؤولتينه آليپ گيديأر. 2001- نجى يئلينگ 27- نجى ايونيندا قازاغيستانينگ تهرانداقى ايلچيسى توركمنصحرادا ياشايان قازاقلارينگ آراسينا آيلانيپ گؤريپ، اولارينگ حال- ياغدايئندان خبر آليپدير. آ- حانى بيزينگكيلر؟!!

پره زيدنت نيازوف دونيأ توركمنلرىنينگ گومانيتار بيرلشيگـى آغضالارينى يئلدا بير گزك آشغابادا يئغناپ، اؤزينه چاپاق چاپديريپ حزيل اتمكدن باشغا زات اده نوق. بو يئل بولسا بئييك ديين لاقامى قازاندى، واخ پيغمبر تيتولينى- دا آلجاقدى ولين ايراندان، آوغانيستاندان و توركيه دن باران حورماتلى ياشولىلارينگ نأگيله ليكلرى بولايدى، يوغسام قاقاميرات بالليف داغى اونونگ سناريوسينى يازيپ، نشردا چاپ اديپ باشلاپديلار. حانى گؤره يلى گلن يئل نأمه اويون توروپ، توركمنباشا نأمه سيلاغ- حورماتلار بريليأر!!

گؤرشيميز يالى توركمنيستاندان داشاردا ياشايان توركمنلره آتا مكاندا اورون برمك ايشينده- ده جناب نيازوف- ينگ اديل نفت- گاز سياساتيندا بولشى يالى شاوسوزليغا اوچرادى.

 

نيازوف و داشارى يورتلاردا ياشايان توركمنلر

1958- نجى يئلينگ 8- نجى دكابرينده توركمنيستانينگ داشارى ايشلر منيسترليگـىنينگ يانيندا داشارى يورتلار بيلن دوستليقلى و مدنى آراقاتناشيقلار جمعيتى دؤره ديلدى. سونگرا قيسغالديليپ دوستليق جمعيتى ديين بو ادارا، توركمنيستاندان داشاردا ياشايان توركمنلر بيلن حاط قاتناشيغينى يولا قويوپ، اولارا نشر- ژورنال و توركمنيستانينگ دورموشينا دگيشلى ماترياللارى ايبريأردى. 1987- نجى يئللاردا آشغابات راديوسيندا داشارى يورتلاردا ياشايان توركمنلر منينگ واطانيم آدلى راديو گپله شيك افيره بريليپ باشلاندى.

1991- نجى يئلدا، قاراشسيزليغينگ جار اديلمگيندن بيرنأچه آى سونگرا توركمنيستاندا دونيأ توركمنلرىنينگ گومانيتار بيرله شيگـى دؤره ديلدى. 92- نجى يئلينگ ماى آيئندا ماغتيمغولى شاهيرينگ پاييزيا بايرامچيليغى گونلرى ائغلان اديلنده، گومانيتارينگ- ده 1- نجى قورولتايى گچيريلدى. بيرلشيگينگ باشليغينا توركمنيستانينگ پره زيدنتى نيازوف بلله ندى و اورونباسارليغينا بولسا ايران، آوغانيستان، توركيه و قاراغالپاغيستاندان باران توركمنلردن بلله ندى.

اديل شول گونلر آزات يوروپا/ آزاتليق راديوسىنينگ توركمن قوللوغىنينگ مديرى محمد ظريف نظر آشغابادا باريپ، نيازوف بيلن اينترويو گچيرمگـى باشاردى. شوندا نيازوف، ساويت دؤورينده يوردى ترك اديپ گيدنلره، دولانيپ گلمأگه ايسلگ بيلديرن ياغدايئندا، ير- يورت بريلجكديگينى آيديپدى.

توركمنيستان بيرلشن ملتلر قوراماسىنينگ حاطارينا قبول اديلنده، ملى بايداغيميز، بئيله كى قاراشسيز دؤولتلرينگ حاطاريندا آل-آسمانا پاسديراپ دوراندا، سونگرا دورا- بارا ملى پولوميز چيقاندا، توركمن ديلينه دؤولت ديلى حقوقى بريلنده بگنجيميزده دونوميزا سيغماديق دييپ بير ايرانلى توركمن ييگيدى آيديار. اوزال پارسلارينگ يانيندا اگنيميزى قيسيپ يؤره يأن بولساق، ايندى اولار حانها سيزينگ پره زيدنتگيز دييپ، بيزينگ- ده آرقاميزينگ بارديغينا گؤز يترديلر. بير گزه ك نيازوف توركمنصحرا گليأر ديين گوررينگ يايراندا آدملار باريپ كلاله بيلن كوممت قاويز آراسيندا تاقمين 60- 50 كيلومتر حاطارا دورديلار. نيازوف كوممت قاويزينگ مناراسىنينگ دينگـىنينگ اوستونه چيقيپ، توركمنلرينگ ياشولىلارى بيلن دوشوشدى. سونگرا مختومقلى گونلرينده پره زيدنت نيازوف آق دوقايا گلنده بويسانماق بويسانارديق. دييپ بو ايلدشميز گوررينگـى دوام اتديريأر. يؤنه نأدرسينگ ايزى بولمادى- دا. او نأمه دييپ سوراميزدا. اول دمينى دورسأپ. بيرينجيدن توركمنيستاندا اوقوولارينى دوام اتديرجكلرينگ هرسيندن مونگلأپ- مونگلأپ دولار برمگينى شرط اديپ قويدى. ايكينجيدن، ايرانليلار توركمنيستاندا پارس ديل مكدبينى آچيان بير واقتيندا بيز- توركمنيستاندا بئيله اديپ، توركمنصحرادا توركمن ديل مكدبينى يولا قويار دييپ طماع اتديك، يؤنه بو آرزوميزدا پووچا چيقدى. اوچونجيدن، آرقايئن توركمنيستانا باريپ گلمگيميزينگ اؤنگـى آلينيپ ويزا رژيمى گيريزيلدى. اينها سونگقيسينى- دا اشدنسينگيز، كيم- ده كيم توركمنيستانلى قيز بيلن دورموش قورجاق بولسا توركمنباشىنينگ دؤولت بانكينا 50 مونگ دلار برملى دييپ، اول بنده زارينلادى.

ايران حكومتينه قارشى دوريپ، اؤز ياشايان توركمنصحراسينه آوتونوم حقوقينى قازانديرماق يولوندا گؤره شيپ، سونگرا تهرانينگ قشون سورمگـى نتيجه سينده توركمنيستانا سيغنان توركمنلرده حأضير اونلارچا ماشغالا آشغابات و يوردينگ بئيله كى شهرلرينده ياشايار. نيازوف اولارينگ هيچ بيرسينى سياسى بوسغون حؤكمينده اقرار ادمأن اولار نه گراژدانليق حقوقينى بريأر نه- ده يورتدان چيقيپ 3- نجى بير دؤولته سيغينماغا ممكينچيليك بريأر. اولار اديل زنداندا ياشايان يالى ياشايارلار. بو توركمنلر بيرلشن ميللتلر قوراماسينا اؤز دردلرينى بيان اديأن عرض- شكايتلارى اتسه ده پئيدا برمأن گليأر. اولار پاسپورتدان-آ مونگ بيزار، ايندى جانلارىنينگ حاوپسوزليغى اوپجين اديلسه راضى بولدولار. توركمنيستانا سيغنان ايرانلى توركمنلرينگ آراسيندا گؤرنوكلى سياسى و دينى ليدر ولىمأد آخون ارزانشينگ جانينا ايكى گزه ك قصد اديلدى. يؤنه توركمن حكومتى تروريستى تاپماغا آلادا- دا اتمه دى دييپ، آشغاباتدا بوسغونليقدا يؤرن ايرانلى توركمنلر بلله ديلر. 

توركمنيستانينگ اساسى قانونىنينگ 8- نجى ماده سينده شئيله ديليأر: " داشارى يورت واطانداشلارينا يا- دا واطانداشليغى بولماديق آداملارا، اگر قانوندا باشغا حيلى بللنمديك بولسا، توركمنيستانينگ واطانداشلارينيگقى يالى حقوقلار هم آزاتليقلار بريليأر. توركمنيستان، اؤز يورتلاريندا سياسى، ملى يا دينى اينام-ايغتيـقادلارى اوچين ايزارلانيان داشارى يورت واطانداشلارينا پنالاماق حقوقينى بريأر".

يؤنه كاغذ يوزينده يازيلان قانون بيلن دورموشا گچمگـى آراسيندا داغ بيلن دره يالى پارخ- تفاوت بار. توركمن پاسپورتى اونى ايسله مأن الىنينگ ترسى بيلن آلانلارا بريلدى ولين اونى آرزو اديأن توركمنه نصيب ادمأن گليأر.